Վառելիքի գնի բարձրացման պատճառով Վրաստանում ապրիլին տարեկան գնաճի մակարդակը հասել է 5,9%-ի, իսկ նախորդ ամսվա համեմատ գնաճը կազմել է 1,7%։ Սա 2024-2026 թվականների ժամանակահատվածում գնաճի առավելագույն ցուցանիշն է։

Վրաստանի ազգային վիճակագրական ծառայության զեկույցի համաձայն՝ գների փոփոխություններն ըստ խմբերի ստորև.

Տրանսպորտ (+10,3%)

Այս խմբում գներն աճել են ամենաշատը, ինչը պայմանավորված է վառելիքի թանկացմամբ։

• Անձնական տրանսպորտային միջոցների շահագործումն աճել է 15,1%-ով։

• Տրանսպորտային ծառայությունների գները բարձրացել են 9,2%-ով։

Սննդամթերք և ոչ ալկոհոլային ըմպելիքներ (+7,5%)

Այս խումբն ամենամեծ ազդեցությունն է ունեցել տարեկան գնաճի վրա։ Հիմնական թանկացումներն են.

• Ձկնեղեն՝ 21,3%

• Միրգ և խաղող՝ 11,8%

• Միս և մսամթերք՝ 10,1%

• Բանջարեղեն և բոստանային մշակաբույսեր՝ 9,3%

• Հաց և հացաբուլկեղեն՝ 7,7%

Բնակարան, ջուր, էլեկտրաէներգիա և գազ (+6,5%)

Այս ոլորտում գների աճը կապված է ապրիլի 1-ից էլեկտրաէներգիայի սակագների բարձրացման հետ։

• Էլեկտրաէներգիայի, գազի և վառելիքի այլ տեսակների ենթախմբում գներն աճել են 10,2%-ով։

• Բնակարանի ընթացիկ սպասարկումը և վերանորոգումը թանկացել են 4,3%-ով։

Այլ ապրանքներ և ծառայություններ (+9,0%)

• Անձնական իրերի ենթախմբում գրանցվել է զգալի՝ 49,6% աճ։

• Ապահովագրության գներն աճել են 8,5%-ով, իսկ անձնական հիգիենայի պարագաներինը՝ 4,6%-ով։