Թբիլիսիի վերաքննիչ դատարանի դատավոր Պաատա Սիլագաձեն անփոփոխ թողեց քաղաքային դատարանի վճիռը 2024 թվականի դեկտեմբերի բողոքի ցույցերի ժամանակ ձերբակալված ութ ցուցարարների վերաբերյալ։

Առաջին ատյանի դատարանի դատավոր Թամար Մճեդլիշվիլին նրանց մեղավոր ճանաչեց հասարակական կարգը կոպտորեն խախտող խմբակային գործողություն կազմակերպելու համար։

Մեղադրյալներն իրենց վերաքննիչ բողոքում պահանջում էին չեղյալ հայտարարել առաջին ատյանի դատարանի վճիռները և արդարացնել իրենց։
Այս գործով Վեփխիա Կասրաձեն, Վասիլ Կաձելաշվիլին և Զվիադ Ցեցխլաձեն դատապարտվել են 2.5 տարվա ազատազրկման, իսկ մնացած 5 մեղադրյալները՝ Իրակլի Միմինոշվիլին, Թոռնիկե Գոշաձեն, Ինսաֆ Ալիևը, Նիկոլոզ Ջավախիշվիլին և Գիորգի Գորգաձեն՝ 2 տարվա ազատազրկման։

«Իմ անմեղությունը միանշանակ է, և այս գործը անպայման կհասնի Ստրասբուրգի դատարան», — մայիսի 11-ին Վերաքննիչ դատարանում կայացած նիստում ասել է ցուցարարներից մեկը՝ Զվիադ Ցեցխլաձեն: