Եվրոպայի լիբերալների և դեմոկրատների դաշինքը (ALDE) հաղորդում է վրացի ընդդիմադիր քաղաքական գործիչ Զուրաբ Ջափարիձեի ձերբակալության մասին Թուրքիայում։
Զուրաբ Ջափարիձեի «Գիրչի» կուսակցությունը ALDE-ի անդամ է։
Ըստ կազմակերպության՝ Ջափարիձեն ձերբակալվել է Թուրքիայի օդանավակայանում, իսկ նրա անձնագիրն ու ուղեբեռը առգրավվել են։ ALDE-ն գրում է, որ նա կվերադառնա Վրաստան հոկտեմբերի 15-ին։
Ջափարիձեն Ստամբուլով մեկնում էր Բրյուսել, որտեղ նրան հրավիրել էին «Renew Europe» առաջնորդների գագաթնաժողովին։ Սա Եվրոպական խորհրդարանի լիբերալ քաղաքական խումբն է։ Գագաթնաժողովը տեղի կունենա հոկտեմբերի 15-ին։
«Մենք ցավում ենք, որ նա չի կարողանա մասնակցել գագաթնաժողովին։ Ցավալի է, որ նման ճնշումը շարունակվում է ընդդիմադիր կուսակցությունների գործունեության և շարժման վրա, որոնք ձգտում են իրենց երկրի համար եվրոպամետ և ժողովրդավարական ապագայի», — ասվում է ALDE-ի հայտարարության մեջ։
