Վրաստանի արտաքին գործերի նախարար Իլիա Դարչիաշվիլին աշխատանքային այցով գտնվում է Բրյուսելում, որտեղ հանդիպումներ է նախատեսված ԵՄ անդամ երկրների արտաքին գործերի նախարարների հետ։ Տեղեկությունը տարածում է Վրաստանի արտաքին գործերի նախարարությունը (ԱԳՆ):
Վրաստանի ԱԳՆ փոխանցմամբ՝ նախարարները հանդիպում են ԵՄ արտաքին հարաբերությունների խորհրդի շրջանակներում։
Դարչիաշվիլին արդեն իսկ հանդիպել է Բուլղարիայի արտաքին գործերի նախարար Թեոդորա Գենչովսկային։ Հանդիպման հիմնական թեման եղել է ԵՄ-ին Վրաստանի անդամակցության հայտը և ընթացող ընթացակարգերը։
«Բուլղարական կողմը դրական է գնահատել Վրաստանի կողմից ինքնագնահատման հարցաշարի լրացումը, ինչպես նաև վերահաստատել է Բուլղարիայի ամուր աջակցությունը Վրաստանի եվրոպական նկրտումներին։ Հանդիպմանը դրական է գնահատվել եվրաինտեգրման ճանապարհին Վրաստանի հաջող առաջընթացը, իրականացված բարեփոխումները և այդ առումով Վրաստանի առաջատար դիրքը Արևելյան գործընկերության ձևաչափում։ Նախարարները հույս են հայտնել, որ այս առաջընթացը պատշաճ կերպով կգնահատվի ԵՄ-ի կողմից՝ անդամակցության թեկնածուի վերաբերյալ որոշում կայացնելիս: Այս համատեքստում ուշադրության կենտրոնում էր ԵՄ գլխավորած եռյակի ձգտումները հաշվի առնելը, ինչը կարևոր է այս երկրների առջև ծառացած մարտահրավերների լույսի ներքո»,- ասված է ԱԳՆ տարածած հաղորդագրության մեջ։
Նշվում է, որ խոսելով երկկողմ հարաբերությունների մասին՝ նախարարներն ընդգծել են դիվանագիտական հարաբերությունների 30-ամյակը և նշել երկկողմ գործընկերությունն էլ ավելի ամրապնդելու և բոլոր առանցքային ոլորտներում համագործակցությունն ակտիվացնելու պատրաստակամությունը.
«Առանձնահատուկ ուշադրություն է դարձվել տարանցիկ ուղիների զարգացման գործում երկու երկրների տնտեսական ուղղությանը և համագործակցությանը՝ հաշվի առնելով Վրաստանի և Բուլղարիայի՝ որպես սևծովյան երկրների ներուժը։ Բարձր են գնահատվել ավանդական բարեկամական միջժողովրդական շփումները և միջժողովրդական բարեկամության հետագա խթանումը զբոսաշրջության ոլորտի ակտիվացման միջոցով»:
Ըստ ԱԳՆ-ի՝ Բուլղարիայի արտգործնախարարը Դարչիաշվիլիին պաշտոնական այցով հրավիրել է Սոֆիա։
