ԱՄՆ-ում Վրաստանի դեսպան Թամար Տալիաշվիլին հանդիպել է հանրապետական սենատոր Մարկվեյն Մալինին։
Վրաստանի դեսպանատան հաղորդմամբ՝ հանդիպման ընթացքում քննարկվել են վրաց-ամերիկյան հարաբերությունների ամրապնդման հեռանկարները։
«Դեսպանն ընդգծել է սենատոր Մալինի անձնական ներդրումը երկկողմ հարաբերությունների զարգացմանն աջակցելու գործում և երախտագիտություն հայտնել նրան որպես Վրաստանի իսկական բարեկամի։ Զրույցի ընթացքում անդրադարձ է եղել տարածաշրջանում ստեղծված իրավիճակին, արդիական իրադարձություններին և նախագահ Թրամփի խաղաղարար նախաձեռնությունների կարևորությանը։ Կողմերը նաև մտքեր են փոխանակել միջազգային ասպարեզում առկա հնարավորությունների վերաբերյալ», — ասված է ԱՄՆ-ում Վրաստանի դեսպանատան հաղորդագրության մեջ։
Նշենք, ամերիկյան լրատվամիջոցների փոխանցմամբ՝ Սենատի հանրապետական առաջնորդ Ջոն Թունը սենատոր Մարկվեյն Մալինի միջնորդությամբ արգելափակել է MEGOBARI Act-ի («Վրաստանի հաշվետվողականության, կայունության և անկախության կարողությունների ամրապնդման և մոբիլիզացման ակտ») օրենքի ներառումը Ազգային պաշտպանության լիազորման մասին օրենքում (NDAA):
Մալինը նախկինում քննադատել է «Վրացական երազանք»-ին։ Նա Բիձինա Իվանիշվիլիին անվանել է «ռուսական կրթություն ստացած օլիգարխ» և 2020 թվականին բաց նամակ է հղել վարչապետ Գիորգի Գախարիային՝ քննադատելով Վրաստանի կառավարությանը տնտեսական միջավայրի և ժողովրդավարության վատթարացման համար։
Այնուամենայնիվ, դրանից հետո հարցազրույցներից մեկում Մալինն ասել է, որ լավ հարաբերություններ ունի իշխող «Վրացական երազանք» կուսակցության վարչապետ Իրակլի Կոբախիձեի հետ և պնդել է, որ պատժամիջոցների «մտրակի» փոխարեն Թբիլիսիին պետք է խրախուսել «մեղրամոմով»։
