Վրաստանում մայիսի 26-ին նշվում է Անկախության օրը։ Երկրի տարբեր պետական ​​գերատեսչություններ այս օրվա կապակցությամբ միջոցառումներ են անցկացնում 16 քաղաքներում։

Անկախության օրվա տոնակատարությունը կսկսվի ժամը 11:00-ին, Վրաստանի 10 շրջաններում և Թբիլիսիում կանցկացվի ժամկետային զինծառայողների երդման արարողություն։

Անկախության օրվա միջոցառումների ցանկն ըստ քաղաքների՝ այստեղ:

1918 թվականի մայիսի 26-ին Վրաստանի Ազգային խորհուրդը Թբիլիսիում ընդունեց Պետական ​​անկախության ակտը և անկախություն հռչակեց Ռուսական կայսրությունից։

Սակայն Խորհրդային օկուպացիայի և անեքսիայի պատճառով Վրաստանի Դեմոկրատական ​​Հանրապետությունը դադարեց գոյություն ունենալ 3 տարուց էլ քիչ անց։

1989 թվականի ապրիլի 9-ի ողբերգությունից հետո երկրում ակտիվացել էր ազգային շարժումը։ Վրաստանի Գերագույն խորհուրդը ստիպված եղավ 1921 թվականի փետրվարի 25-ի ակտը ճանաչել որպես Ռուսաստանի կողմից Վրաստանի օկուպացիա։ Ավելի ուշ նշանակվեցին Գերագույն խորհրդի ընտրություններ։ Ընտրությունները տեղի ունեցան 1990 թվականի հոկտեմբերի 28-ին, և հաղթանակ տարավ Զվիադ Գամսախուրդիայի գլխավորած «Կլոր սեղան-Ազատ Վրաստան» կուսակցությունը։

1991 թվականի մարտի 31-ին Գերագույն խորհուրդը համընդհանուր հանրաքվե անցկացրեց հետևյալ հարցով.

«Համաձա՞յն եք 1918 թվականի մայիսի 26-ի Անկախության ակտի հիման վրա Վրաստանի պետական ​​անկախության վերականգնմանը»։

Վրաստանի բնակչության 98,9 տոկոսը կողմ արտահայտվեց Վրաստանի անկախության վերականգնմանը։

1991 թվականի ապրիլի 9-ին հանրաքվեի հիման վրա Գերագույն խորհուրդը հայտարարեց Վրաստանի անկախության վերականգնման մասին։

Նույն թվականի մայիսի 26-ին Վրաստանն ընտրեց առաջին նախագահ Զվիադ Գամսախուրդիային։