«Վրացական երազանք»-ի խորհրդարանը երրորդ ընթերցմամբ՝ արագացված կարգով, հաստատել է «Բարձրագույն կրթության մասին» օրենքում փոփոխությունները։
Օրինագիծը նախատեսում է ուսուցիչների վերապատրաստման հնգամյա ինտեգրված բակալավրի և մագիստրոսի ծրագրի վերացում։ Փոփոխության արդյունքում ուսուցիչների վերապատրաստումը կլինի բակալավրի աստիճանի։
Օրինագիծը փոփոխություններ է ներառել պետական հիմնադրությամբ բարձրագույն ուսումնական հաստատությունների վերակազմակերպման իրավական շրջանակում։ Վրաստանի կառավարությունը լիազորված կլինի ընդունել որոշում, որը կներառի վերակազմակերպման նպատակները, ձևը և պայմանները, վերակազմակերպման գործընթացի կառավարման ժամանակավոր մեխանիզմները, նաև վերակազմակերպմանը մասնակցող պետության ստեղծած բարձրագույն ուսումնական հաստատությունների կառավարման մարմինների լիազորությունների իրականացման հատուկ կարգը։ Նույն որոշմամբ, վերակազմակերպման ժամանակահատվածում կարող է կասեցվել կամ փոփոխվել պետության ստեղծած բարձրագույն ուսումնական հաստատությունների օրենքով և/կամ կանոնադրությամբ սահմանված առանձին կառավարման մարմինների լիազորությունների իրականացման կարգը, եթե դա անհրաժեշտ է վերակազմակերպման նպատակներին հասնելու համար։
Այդ դեպքում Կրթության նախարարը լիազորված կլինի նշանակել ժամանակավոր ռեկտոր, վարչակազմի ղեկավարի ժամանակավոր պաշտոնակատար, որակի ապահովման ծառայության ղեկավարի ժամանակավոր պաշտոնակատար և ստեղծել ժամանակավոր կոլեգիալ կառավարման մարմին՝ Ժամանակավոր կառավարման խորհուրդ, որին կփոխանցվի ակադեմիական խորհրդի և/կամ ներկայացուցչական խորհրդի լիազորությունների իրականացումը՝ Վրաստանի կառավարության որոշմամբ սահմանված շրջանակներում և ժամկետով։
Ակադեմիական անձնակազմի ցանկին կավելացվի առաջատար պրոֆեսորի պաշտոնը. կկարգավորվեն նաև այդ պաշտոնը զբաղեցնող անձի իրավունքները՝ լինելու ակադեմիական խորհրդի անդամ և մասնակցելու դեկանի ընտրության գործընթացին։
Օրենքի նախագծի համաձայն՝ առաջատար պրոֆեսորի ակադեմիական պաշտոնում կարող է ընտրվել դոկտորի կամ համարժեք ակադեմիական աստիճան ունեցող անձը, որն ունի առնվազն 8 տարվա գիտական և մանկավարժական աշխատանքի փորձ, ունի բացառիկ գիտական նվաճումներ (գիտական հրապարակումներ առաջատար տեղական և միջազգային ամսագրերում և այլ հրատարակություններում, մասնակցել է ազգային և միջազգային գիտահետազոտական նախագծերի և այլն), և որը համապատասխանում է բարձրագույն ուսումնական հաստատության կանոնադրությամբ սահմանված լրացուցիչ պայմաններին։
