Վրաստանի վարչապետ Գիորգի Գախարիայի հայտարարությամբ, Վրաստանում գործող հեռավար կրթության մոդելը, որը մշակվել է ընդհամենը վերջին մեկ ամսվա ընթացքում, աշխարհում ամենաստացվածներից ու լավագույններից է: Կորոնավիրուսի հետ կապված միջգերատեսչական խորհրդի նիստի ընթացքում վարչապետը ասել է, որ այս մասին գնահատականն իր հաշվետվություններից մեկում տվել է Տնտեսական համագործակցության զարգացման միջազգային կազմակերպությունը (OECD):
Գախարիայի խոսքով, այս քայլը հնարավորություն կտա երկրի կառավարությանը կրթության նախարարության հետ հաղթահարել առկա մարտահրավերը:
Կրթական գործընթացներն այս պահի դրությամբ ընթանում են հեռավար: Համալսարանները կիրառում են տարբեր առցանց հարթակներ՝ դասախոսություններն անցկացնելու նպատակով, դպրոցներում ևս դասերն անցկացվում են առցանց միացումների, ինչպես նաև Վրաստանի հանրային ալիքի «Հեռուստադպրոցի» միջոցով:
