Դերասանուհի և հեռուստահաղորդավարուհի Իա Փարուլավան դատի է տվել մի քանի լրատվամիջոցների, այդ թվում՝ իշխանամետ «Իմեդի» հեռուստաընկերությանը, զրպարտության համար։ Պատճառն այն է, որ, ըստ Փարուլավայի՝ լրատվամիջոցները նրան անվանել են «բռնի բողոքի կազմակերպիչ»։

Իա Փարուլավան հայտնել է «Ազատություն» ռադիոկայանին, որ իր դեմ ապատեղեկատվության տարածումը սկսվել է օգոստոսի 21-ին` իր կազմակերպած բողոքի ցույցերից հետո։

«Մինչև օգոստոսի 21-ը լռություն էր… Ես իսկապես երկու խաղաղ և ոչ բռնի ցույցերի կազմակերպիչներից մեկն էի 2025 թվականի մարտի 22-ին և հուլիսի 4-ին, որտեղ քաղաքացիները բողոքում էին մեր երկրի համար կարևոր հարցերի շուրջ։ Սա «բռնի» անվանելը միտումնավոր սուտ է, որը նպատակ ունի արատավորելու իմ անունն ու հեղինակությունը», — ասել է նա։