«Վրացական երազանք» կուսակցության խորհրդարանն առաջին լսմամբ 77 կողմ և 3 դեմ ձայներով ընդունել է «Բարձրագույն կրթության մասին» օրենքում և դրա հիման վրա կազմված օրենքների նախագծերում փոփոխությունները, որոնք վերաբերում են բարձրագույն կրթության բարեփոխումներին։
Ըստ բարեփոխումների՝ բարձրագույն կրթության համակարգում կներդրվի ֆինանսավորման նոր մոդել։ Դրամաշնորհային ֆինանսավորումը կվերացվի։ Ըստ փոփոխությունների՝ Վրաստանի կառավարության հիմնադրած բարձրագույն ուսումնական հաստատություններում ուսումն ամբողջությամբ կֆինանսավորի պետությունը` ըստ քվոտավորման սկզբունքի։
Մասնավոր համալսարան ընդունվելու դեպքում ուսանողին այլևս դրամաշնորհ չի տրամադրվի։ Համալսարանական համակարգում կներդրվի նաև 3+1 համակարգ, որտեղ 3 տարի կտրվի բակալավրի աստիճանին, իսկ 1 տարի՝ մագիստրոսի աստիճանին։
Վրաստանի կառավարությունն ամեն տարի ինքը կորոշի, թե ուսումնական տարվա ընթացքում քանի ուսանող կընդունեն պետական համալսարաններ։
«Վրացական երազանք»-ը մտադիր է ներդնել «մեկ ֆակուլտետ՝ մեկ քաղաք» սկզբունքը։ Այսինքն՝ պայմանականորեն, պետական համալսարաններում իրավաբանական ֆակուլտետը կարող է գործել միայն Թբիլիսիում, լրագրության ֆակուլտետը՝ միայն Քութաիսիում և այլն։ Հայտնի չէ, թե ընդհանուր առմամբ քանի ուսանող կկարողանա սովորել բյուջետային ֆինանսավորմամբ։ Վերլուծաբաններն ու փորձագետները կանխատեսում են, որ երկրում ուսանողների թիվը զգալիորեն կնվազի։
Վրաստանի կառավարությունը, Կրթության նախարարության միջոցով, համալսարանների համար կսահմանի կրթական ծրագրերի (ուսումնական պլանի) ցանկը, որոնք նրանք իրավունք կունենան իրականացնելու։
