2026 թվականի առաջին կեսին Վրաստանի միջազգային օդանավակայաններում ուղևորահոսքը հասել է 3.6 միլիոնի, հայտարարել է Օդանավակայանների միավորման ղեկավար Լևան Մոսեշվիլին։
Մոսեշվիլիի խոսքով՝ միջազգային օդանավակայաններից ուղիղ չվերթերի քանակն ու հաճախականությունն ավելանում են, ինչը վկայում է այն մասին, որ Վրաստանի ավիացիոն շուկան կայուն զարգանում է։
«Ամբողջ աշխարհում ավիացիան աճող ոլորտ է, իսկ Վրաստանում այս աճն առանձնահատուկ կերպով է նկատվում։ Անցյալ տարվա վիճակագրական ցուցանիշները, իրականացված ներդրումները և ավիաընկերությունների հետաքրքրությունը դրա վառ ապացույցն են։ Ավիացիոն խոշոր ոլորտի տարբեր ներկայացուցիչների հետաքրքրությունը Վրաստանի նկատմամբ շատ արագ է աճում, և մենք ուրախ ենք, որ քայլում ենք այս պահանջարկին համընթաց»,- ասել է Մոսեշվիլին։
Նրա փոխանցմամբ՝ ակտիվորեն աշխատանքներ են տարվում ինչպես օդանավակայանների զարգացման, այնպես էլ ավիաընկերությունների հետաքրքրության աճի և բանակցությունների ուղղությամբ, որպեսզի Վրաստանում ավելի շատ չվերթեր իրականացվեն, և ավելի շատ ավիաընկերություններ ներկայացված լինեն։
2026 թվականի առաջին վեց ամսում Վրաստանի օդանավակայաններից փոխադրվել է ավելի քան 21 հազար 500 տոննա բեռ, ինչը նախորդ տարվա նույն ժամանակահատվածի համեմատ 29% աճ է նշանակում։
