Վրաստանից չվերահսկվող Աբխազիայի և Ցխինվալիի (Հարավային Օսիա) շրջանների դե ֆակտո արտաքին գործերի նախարարությունները (ԱԳՆ) հայտարարություն են տարածել ի պատասխան «Վրացական երազանք»-ի կառավարության վարչապետ Իրակլի Կոբախիձեի հարցազրույցի, որում վերջինս քննարկել է Վրաստանի տարածքային ամբողջականության վերականգնման հարցը։
Ըստ օկուպացված Աբխազիայի դե ֆակտո ԱԳՆ-ի, «Վրաստանի իշխանությունների հայտարարությունն ապացուցում է, որ նրանք չեն ցանկանում բաժանվել հին մոտեցումներից, որոնք վաղուց անհամատեղելի են ստեղծված իրականության հետ»։
«Վրաստանի հետ հետագա համակեցությունը հնարավոր է բարիդրացիության և փոխադարձ հարգանքի հիման վրա: Տարածքային ամբողջականության վերականգնման մասին հայտարարությունների փոխարեն մենք կցանկանայինք տեսնել կառուցողական երկխոսության ցանկություն և փոխզիջումների որոնում, ինչը հնարավորություն կտա ստեղծելու խաղաղ և փոխշահավետ հարաբերություններ», — ասված է Աբխազիայի դե ֆակտո ԱԳՆ-ի հայտարարության մեջ:
Ցխինվալիի շրջանի դե ֆակտո ԱԳՆ-ի հաղորդագրության մեջ նշված է. «Հարավային Օսիայի նպատակն է ստեղծել անկախ պետություն, և նա մտադիր չէ փոխել իր զարգացման վեկտորը և ձգտում է իր անվտանգության երաշխավորի՝ Ռուսաստանի Դաշնության հետ հարաբերությունների համակողմանի ամրապնդման»։
Դե ֆակտո գերատեսչություններն ասել են, որ «իրենց համար անընդունելի են պաշտոնական Թբիլիսիի արտահայտած թեզերն ու գաղափարները հարաբերությունների կարգավորման հնարավորությունների վերաբերյալ»։
«Վրացական երազանք»-ի կառավարության վարչապետ Իրակլի Կոբախիձեի կարծիքով, տարածքային ամբողջականության վերականգնմանը կարելի է հասնել «համբերությամբ» և «հետևողական քաղաքականությամբ»։ Դրա մասին նա հայտարարել է ապրիլի 6-ին իշխանամետ «Իմեդի» հեռուստաընկերությանը տված հարցազրույցում։
Դեռ 2024 թվականի խորհրդարանական ընտրություններից առաջ «Վրացական երազանք»-ի ներկայացուցիչները բազմիցս բարձրացրել են տարածքային ամբողջականության վերականգնման հարցը։ Կուսակցության պատվավոր նախագահ Բիձինա Իվանիշվիլին հայտարարել էր, որ ցանկացած պահի կարող է ծագել Վրաստանի տարածքային ամբողջականության վերականգնման հարց, ինչը կստիպի Վրաստանի Սահմանադրության մեջ համապատասխան փոփոխություններ կատարել։
Իվանիշվիլին ասել էր, որ հոկտեմբերի 26-ին կայանալիք խորհրդարանական ընտրություններում սահմանադրական մեծամասնություն ստանալու դեպքում «Վրացական երազանք»-ի թիմը պատրաստ կլինի երկիրը տեղափոխել սահմանադրական կարգավորման մոդել, որը կապահովի երկրի տարածքային ամբողջականությունը։ Նա խոսել էր նաև օս ժողովրդից 2008 թվականի իրադարձությունների համար ներողություն խնդրելու անհրաժեշտության մասին։
Ռուսաստանի արտգործնախարար Սերգեյ Լավրովը հայտարարել է, որ «Մոսկվան պատրաստ է օգնել Վրաստանին, Աբխազիային և Հարավային Օսիային հարաբերությունների կարգավորման գործընթացում», եթե դրանում շահագրգռված լինեն իրենք՝ «երկրները»։ Միաժամանակ Մոսկվան հայտարարել է, որ չի պատրաստվում հրաժարվել օկուպացված Աբխազիայի և Հարավային Օսիայի «անկախության ճանաչումից»։
