Վրաստանի բնակիչների համար մինչև տարեվերջ կապույտ վառելիքի թանկացում չի նախատեսվում, այս մասին հայտարարել է Վրաստանի էներգետիկայի և ջրամատակարարման կարգավորման ազգային հանձնաժողովի ներկայացուցիչ Գիորգի Պանգանին։
Հաջորդ տարվա մասին ստույգ կանխատեսում չկա, սակայն հանձնաժողովն ակնկալում է, որ առկա սակագինը կհաջողվի պահպանել։
«2022 թվականի վերջին բոլոր խոշոր ընկերությունների սակագները կվերանայվեն, թեև մենք արմատական փոփոխություններ չենք ակնկալում, քանի որ ընդհանուր առմամբ լավ կանխատեսումներ ունենք», — ասաց Պանգանին։
Վրաստանի քաղաքացիները մտահոգություն են հայտնել գազի հնարավոր թանկացման հարցի շուրջ, երբ հայտնի դարձավ, որ հուլիսի 1-ից ոչ ֆիզիկական անձանց (բիզնես սուբյեկտների) համար սակագները կբարձրանան։
Նշենք նաև, որ ոչ ֆիզիկական սպառողների համար Թբիլիսիում 1 խորանարդ մետր գազը կթանկանա 25, իսկ մարզերում՝ 23 թեթրիով։
Հավելենք՝ տեղական արտադրողներն արդեն հայտարարել են, որ դրա պատճառով ստիպված են լինելու թանկացնել մատուցվող ապրանքներն ու ծառայությունները։ Հաց արտադրողների ասոցիացիայի տվյալներով՝ հացը կարող է թանկանալ մի քանի թեթրիով։
