2026 թվականի II քառորդում, նախորդ տարվա համապատասխան քառորդի համեմատ, երկրում գործազրկության մակարդակը նվազել է 0,5 տոկոսային կետով՝ հասնելով 13,8%-ի։ Այնուամենայնիվ, գործազրկության ցուցանիշի նվազումը չի կապվում զբաղվածության աճի հետ, ընդհակառակը` այս ժամանակահատվածում աշխատուժը կրճատվել է, իսկ աշխատուժից դուրս գտնվող բնակչության թիվը զգալիորեն աճել է։ Հետևաբար, այս դեպքում գործազրկության մակարդակի նվազումը չի վկայում աշխատանքային շուկայի բարելավման մասին։
Վրաստանի ազգային վիճակագրական ծառայության մեթոդաբանության համաձայն՝ գործազրկության մակարդակը հաշվարկվում է գործազուրկների թվի և աշխատուժի հարաբերակցությամբ։ Աշխատուժն իր հերթին զբաղված և գործազուրկ, բայցև ակտիվորեն աշխատանք փնտրող բնակչության ամբողջությունն է։ Այստեղ հարկ է նշել, որ այն անձը, որ գործազուրկ է, սակայն հարցման պահին նախորդող չորս շաբաթվա ընթացքում ակտիվորեն աշխատանք չի փնտրել, տեղափոխվում է աշխատուժից դուրս և այլևս չի համարվում գործազուրկ։
Հետևաբար, մի շարք դեպքերում գործազրկության մակարդակը կարող է տեխնիկապես նվազել ոչ թե զբաղվածության աճի, այլ աշխատուժի կրճատման հաշվին։ Դրա պատճառով երկրում գործազրկության դինամիկան և աշխատաշուկայում տիրող իրավիճակը ճիշտ գնահատելու համար միայն գործազրկության մակարդակին հետևելը բավարար չէ, անհրաժեշտ է նաև աշխատուժի և զբաղվածության ցուցանիշների համատեղ վերլուծություն։
2026 թվականի II քառորդում Վրաստանում 15 տարեկան և բարձր տարիքի բնակչության թիվը կազմել է 2,969.7 հազար, ինչը նախորդ տարվա համապատասխան քառորդի համեմատ ավելի է 26 հազարով կամ 0.9%-ով։ 15 տարեկան և բարձր տարիքի բնակչության աճը չի արտացոլվել աշխատաշուկայում ակտիվ մարդկանց թվի աճի վրա։ Ընդհակառակը, այս ժամանակահատվածում աշխատուժի ծավալը կրճատվել է։ 2026 թվականի II քառորդում աշխատուժը կազմել է 1,584.3 հազար, ինչը մեկ տարվա ընթացքում 9.6 հազարով կամ 0.6%-ով նվազած ցուցանիշ է։
