ԵԱՀԿ/ԺՀՄԻԳ-ի խոսնակ Կատյա Անդրուսը «Ֆորմուլա» լրատվամիջոցին ասել է, որ հավաքների ազատությունը բոլոր մարդկանց հիմնարար իրավունքն է և պետք է խթանվի հաղորդակցության, այլ ոչ թե ուժի միջոցով։
Նա հրաժարվել է ուղղակիորեն մեկնաբանել BBC-ի հետաքննական զեկույցը, սակայն հավելել է, որ իշխանությունները ցույցը ցրելու նպատակով չպետք է օգտագործեն նյութեր, որոնք «վնասակար են և անընդունելի հասարակական կարգի պաշտպանության համար»։
«Խաղաղ հավաքների ազատության իրավունքն ամրագրված է մարդու իրավունքների բազմաթիվ փաստաթղթերում: ԵԱՀԿ բոլոր պետությունները պարտավորվել են հարգել այս իրավունքը: Հավաքները պետք է խթանվեն երկխոսության և հաղորդակցության միջոցով, այլ ոչ թե ուժի միջոցով։
Եթե իշխանությունները կիրառում են ուժ, դա միշտ պետք է լինի օրենքին համապատասխան, անհրաժեշտ և համաչափ կոնկրետ հանգամանքներին: ԺՀՄԻԳ-ն արդեն հայտարարություններ է արել Վրաստանում բողոքի ցույցերի կառավարման վերաբերյալ։
Չնայած մենք չենք մեկնաբանի կոնկրետ հաղորդագրությունների փաստական ճշգրտությունը կամ այն, թե այս դեպքում ինչ նյութ է օգտագործվել, մարդու իրավունքների միջազգային չափանիշները և ուժի կիրառման վերաբերյալ հիմնական սկզբունքները պահանջում են, որ իրավապահ մարմինների աշխատակիցները զերծ մնան վնասակար ազդեցություն ունեցող սարքավորումների, այդ թվում՝ քիմիական նյութերի օգտագործումից։
Միայն շատ բացառիկ հանգամանքներում դրանց օգտագործումը կարող է արդարացված լինել, մի շարք պետություններ ընդհանրապես զերծ են մնում դրանց օգտագործումից: Եթե իշխանությունները դիմում են քիմիական նյութերի օգտագործմանը, երբեք չպետք է օգտագործվեն հասարակական կարգի պահպանման համար վնասակար և անընդունելի նյութեր», — ասել է խոսնակը։
