Երևանի պետական համալսարանում (ԵՊՀ) վրացագիտության կենտրոն է բացվել: Բացման արարողությանն իր հայ գործընկեր՝ ՀՀ կրթության, գիտության, մշակույթի և սպորտի նախարար Ժաննա Անդրեասյանի հետ, մասնակցել է աշխատանքային այցով Հայաստանում գտնվող Վրաստանի կրթության, գիտության և երիտասարդության (ԿԳԵ) նախարար Գիորգի Ամիլախվարին:
Բացման արարողության ժամանակ Ամիլախվարին դիմել է ներկաներին և երկու երկրների պատմական բարեկամության խորացման տեսանկյունից ուշադրություն հրավիրել կենտրոնի բացման կարևորության վրա:
«Զրույցի ընթացքում նախարարը հատուկ շնորհակալություն հայտնեց իր հայ գործընկեր Ժաննա Անդրեասյանին, ԵՊՀ ռեկտոր Հովհաննես Հովհաննիսյանին, Վրաստանի և Հայաստանի դեսպաններին՝ վրացական կենտրոնի բացման նախագծի իրականացման գործում ունեցած նշանակալի ավանդի համար»,- նշված է Վրաստանի ԿԳԵ-ի տարածած հաղորդագրության մեջ:
Ամիլախվարին ասել է, որ Վրաստանն աջակցում է ռազմավարական գործընկեր երկրների բարձրագույն ուսումնական հաստատություններում վրացագիտության ուղղությամբ կրթական և հետազոտական գործունեությանը և ակադեմիական գիտելիքների տարածմանը։ Նախարարի խոսքով, հաշվի առնելով Վրաստանի և Հայաստանի ընդհանուր պատմական անցյալը, կարևոր է վրացական և հայկական գիտական շրջանակների հետ համատեղ աշխատանքը և այդ ուղղությամբ երկրների միջև համագործակցության խորացումը։
«Բացման միջոցառման ավարտին Գիորգի Ամիլախվարին կենտրոնին նվիրեց «Ընձենավորը» գրքի թանգարանային օրինակը։ Երևանի պետական համալսարանի վրացագիտության կենտրոնը կնպաստի Վրաստանի պատմության, մշակույթի և գրականության վերաբերյալ ակադեմիական գիտելիքների տարածմանը և փոխանակմանը: Նշենք, որ մինչ Երևանի համալսարանի վրացագիտության կենտրոնի բացումը, Գիորգի Ամիլախվարին աշխատանքային հանդիպում է ունեցել Երևանի համալսարանի ռեկտոր Հովհաննես Հովհաննիսյանի հետ, նրա հետ քննարկել են Վրաստանի բարձրագույն ուսումնական հաստատությունների հետ առկա և ապագա համագործակցության խորացման հարցերը, համատեղ ակադեմիական ծրագրերի և գիտահետազոտական նախագծերի իրականացումը»:
Կենտրոնի բացման արարողությանը մասնակցել է նաև Հայաստանի Հանրապետությունում Վրաստանի արտակարգ և լիազոր դեսպան Գիորգի Շարվաշիձեն:
«Հայագիտությունը Վրաստանում. ձեռքբերումներն ու մարտահրավերները» հոդվածը կարդացեք՝ այստեղ:
