Վրաստանի փոխվարչապետ, էկոնոմիկայի և կայուն զարգացման նախարար Լևան Դավիթաշվիլին պնդում է, որ իշխող «Վրացական երազանք» կուսակցությունը Ռուսաստանին ոչինչ չի տվել: Այս թեմայով նա խոսել է խորհրդարանի ոլորտային տնտեսության և տնտեսական քաղաքականության հանձնաժողովում։
Ըստ փոխվարչապետի՝ իշխող կուսակցությունն ապագայում ևս չի պատրաստվում Ռուսաստանի հետ հարաբերություններում փոխզիջումներ անել։
«Եթե ինչ-որ մեկը ցանկանում է ցույց տալ, որ Վրաստանի իշխանությունն այսօր ինչ-որ կերպ վնասում է Վրաստանի շահերը և ինչ-որ կերպ գաղտնի երկխոսության մեջ է, ինչը տարածվում է հասարակության շրջանում, ապա կարող եմ միանշանակ և ուղիղ ասել՝ այդպես չէ։ Ինչպես ասացի, Վրաստանի կառավարությունը վերջին 10 տարում ոչինչ չի տվել Ռուսաստանին։
Եթե ուզում ենք անուններ տալ և հստակ խոսել օկուպացիայի մասին, ես ձեզ ասում եմ, որ, այո՛, Ռուսաստանն օկուպանտ է, այո՛, Ռուսաստանը թշնամի է, այո՛, Ռուսաստանը հանցագործ է, և Վրաստանի շահերից ելնելով` մենք չենք պատրաստվում Վրաստանի շահերը վնասելով փոխզիջումների գնալ Ռուսաստանի հետ։ Ընդհակառակը, մենք երկխոսություն ենք վարում, որպեսզի հնարավորինս սպասարկենք Վրաստանի շահերը»,- ասել է Դավիթաշվիլին։
Ընդդիմադիր պատգամավոր Խատիա Դեկանոիձեն Դավիթաշվիլիին խնդրել է ևս մեկ անգամ հստակ բացատրել, թե ինչո՞ւ է մասնակցել հոկտեմբերին Չինաստանում կայացած ֆորումին, որին մասնակցել է նաև Ռուսաստանի նախագահ Վլադիմիր Պուտինը։ Դեկանոիձեի խոսքով, մինչ այժմ արված բացատրությունները, որտեղ Դավիթաշվիլին ֆորումին իր ներկայությունը բացատրել է արարողակարգով, իր համար համոզիչ չեն։
Այն ժամանակ փոխվարչապետն ասել էր, որ մասնակիցների գտնվելու վայրի և մասնակիցների մասին վրացական պատվիրակությունն այդ պահին տեղյակ չի եղել. «Ուզում եմ ընդգծել, որ մենք բանակցություններ, երկխոսություն, հանդիպում չենք ունեցել, և դա կեղծ տեղեկատվություն է, շահարկումներ։ Պետությունների ղեկավարների և պատվիրակությունների, այդ թվում՝ նախարարների դասավորվածությունը խառն է եղել։ Հետևաբար, միասին նկարը ևս մոնտաժ է։ Մենք մասնակցել ենք մեր գործընկեր երկրի հանդեպ ունեցած հարգանքի պատճառով։ Սա հարգանք է ընդունող երկրի նկատմամբ, և դա այլ ժեստ չէ, այս դեպքում՝ օկուպանտ երկրի ներկայացուցիչների նկատմամբ»:
Հարցին, թե ինչու վրացական պատվիրակությունը չի լքել դահլիճը, Դավիթաշվիլին պատասխանել էր, որ դա ոչ միայն դիվանագիտական արարողակարգի խախտում կլիներ, այլև՝ կվնասեր Վրաստանի և Չինաստանի հարաբերություններին։
Ի դեպ, հոկտեմբերի 18-ին Չինաստանում «Գոտի և ճանապարհ» նախաձեռնության ֆորումի շրջանակներում անցկացված միջոցառման տեսանյութից երևում է, որ Դավիթաշվիլին մասնակցել է միջոցառմանը, որտեղ ելույթ է ունեցել Վլադիմիր Պուտինը։
