Վրաստանի Հանրային հեռարձակողը չի ստացել ֆուտբոլի 2026 թվականի աշխարհի առաջնության հեռարձակման արտոնագիր։

Հոգաբարձուների խորհրդի նիստում հեռարձակողի ֆինանսական տնօրեն Նոդար Ճիճինաձեն հայտարարել է, որ իրենք մասնակցել են FIFA-ի հայտարարած մրցույթին, սակայն պարտվել են մի մասնավոր ընկերության, որն արտոնագրի դիմաց ֆուտբոլի կառավարող մարմնին շատ ավելի մեծ գումար է առաջարկել։

Ըստ Ճիճինաձեի՝ սա նշանակում է, որ այս պահի տվյալներով հեռարձակողն իրավունք չունի ցուցադրելու աշխարհի առաջնության խաղերը։

Նրա խոսքով՝ այն ընկերությունը, որը գնել է Վրաստանի տարածքում խաղերի ցուցադրման իրավունքը, բանակցություններ է վարում տարբեր հեռուստաընկերությունների հետ՝ հեռարձակման իրավունքը նրանց վերավաճառելու նպատակով։ Նա նշել է, որ իրավիճակը կարող է փոխվել, եթե հնարավորություն և առաջարկ լինի վերոնշյալ ընկերությունից գնելու ենթաարտոնագիր։

Ճիճինաձեն չի նշել վերոնշյալ մասնավոր ընկերության անունը։

Աշխարհի առաջնության մրցաշարը պաշտոնապես կմեկնարկի 2026 թվականի հունիսի 11-ին և կավարտվի եզրափակիչ խաղով՝ հուլիսի 19-ին։

Խաղերը կանցկացվեն Հյուսիսային Ամերիկայի 3 երկրների 16 տարբեր քաղաքներում։