Վրաստանի վարչապետ Իրակլի Կոբախիձեն կմասնակցի Համաշխարհային քաղաքային գագաթնաժողովին, որը տեղի է ունենում Ադրբեջանի մայրաքաղաք Բաքվում՝ ՄԱԿ-ի մարդկային բնակավայրերի ծրագրի (UN-Habitat) հետ համատեղ։
Այս տեղեկությունը տարածել է կառավարության լրատվական ծառայությունը։
Իրակլի Կոբախիձեն ելույթ կունենա Համաշխարհային քաղաքային գագաթնաժողովի 13-րդ նստաշրջանում։ Նախատեսվում է Իրակլի Կոբախիձեի հանդիպումը Ադրբեջանի Հանրապետության նախագահ Իլհամ Ալիևի հետ։
«Գագաթնաժողովի շրջանակներում պետությունների ղեկավարները կքննարկեն կլիմայի փոփոխության և հակամարտությունների պատճառով առաջացած համաշխարհային բնակարանային ճգնաժամի լուծման ուղիները, որը կայուն և ներառական քաղաքային զարգացման կարևոր նախապայմաններից մեկն է։
Գագաթնաժողովին մասնակցում են ավելի քան 180 երկրների ներկայացուցիչներ, այդ թվում՝ տարբեր պետությունների ղեկավարներ, խոշոր բիզնեսի ներկայացուցիչներ, քաղաքաշինարարներ և անշարժ գույքի կառուցապատողներ։
Վրաստանի վարչապետը Բաքու է մեկնել պատվիրակությամբ, որի կազմում են փոխվարչապետ, արտաքին գործերի նախարար Մակա Բոճորիշվիլին, էկոնոմիկայի և կայուն զարգացման նախարար Մարիամ Քվրիվիշվիլին, ներքին գործերի նախարար Սուլխան Թամազաշվիլին և կառավարության աշխատակազմի ղեկավար Լևան Ժորժոլիանին», — ասված է հաղորդագրության մեջ։
