Իշխող «Վրացական երազանք» կուսակցության նախագահ Իրակլի Կոբիխաձեն բացահայտ դեմ է արտահայտվել Թբիլիսիում «հպարտության շաբաթ» անցկացնելու գաղափարին:«Ես իմ վերաբերմունքն ունեմ այս խնդրին և կարծում եմ, որ հաշվի առնելով ամբողջ ենթատեքստը` պետք է մերժել այս միջոցառումը: Այս համատեքստը շատ բարդ է, և պատասխանատու մարդիկ պետք է հրաժարվեն գաղափարից», — լրագրողներին ասել է Կոբախիձեն:
Կոբախիձեի հետ սոլիդար է նաև իշխող թիմի մեկ այլ ներկայացուցիչ: Դավիթ Սերգեենկոն ասել է` «Փոքրամասնությունների ներկայացուցիչներն իրենք պետք է որոշակի չափավորություն ցուցաբերեն»: Հարցին` արդյոք նման հայտարարությունները խախտում են փոքրամասնությունների իրավունքները, և արդյոք կառավարությունը խրախուսում է բռնությունը, Սերգեենկոն պատասխանել է. «Դժվար է ասել: Չեմ կարծում, որ դա իրավունքների սահմանափակում է: Ոչ ոք նրանց չի խանգարում անել այն, ինչին ձգտում են այդ մարդիկ և ինչ են ուզում հասնել, բայց նրանք չպետք է գնան առճակատման: Խոսքի ազատությունը պետք է պաշտպանված լինի Սահմանադրությամբ, բայց չափավորությունն ու ուրիշների կարծիքի նկատմամբ հարգանքը շատ կարևոր են ՝ ինչպես փոքրամասնության, այնպես էլ մեծամասնության համար»:
Հիշեցնենք` «Tbilisi Pride» հասարակական կազմակերպությունը, որն աշխատում է ԼԳԲՏ համայնքի իրավունքների պաշտպանության ոլորտում, հուլիսի 1-5-ը պատրաստվում է անցկացնել «հպարտության շաբաթ»: Նախատեսվում են թեմատիկ դասախոսություններ, ներկայացումներ, ցուցահանդեսներ և այլ միջոցառումներ: Շաբաթվա գագաթնակետը կլինի «Արժանապատվության երթը»: Ակցիան, որին կմիանան քաղաքացիական ակտիվիստներ, ԼԳԲՏ համայնքի ներկայացուցիչներ, կանցկացվի Ռուսթավելի պողոտայում ՝ «Դուրս եկեք համերաշխության համար» կարգախոսի ներքո: ՀԿ-ն հայտարարում է, որ այս կերպ նրանք ցանկանում են համերաշխություն հայտնել` ներկայումս Վրաստանում շարունակվող քաղաքական, սոցիալական և մշակութային բողոքներին: Ակտիվիստները շեշտում են, որ «Արժանապատվության երթը» ոչ մի կապ չունի նույնասեռականների շքերթի հետ:
«Tbilisi Pride»- ի ծրագրերը զայրացնում են «աջակողմյաններին»: «Էրի» (Ազգ) ուլտրա-պահպանողական շարժման հիմնադիր, գործարար Լեւան Վասաձեն Վրաստանի կառավարությանը կոչ է արել «պոռնկության պրոպագանդան արգելող» օրենք ընդունել, նաև պահանջում է, որ կառավարությունը 10 օրվա ընթացքում չեղյալ հայտարարի «Արժանապատվության երթը» և «երկրում էսկալացիայի առիթ չտա»:
Առաջին անգամ «Tbilisi Pride»- ը փորձեց «Արժանապատվության քայլերթն» անցկացնել 2019 -ին: Ակցիան մի քանի անգամ հետաձգվեց ուլտրաազգայնականների հետ բախումների սպառնալիքների պատճառով: Հավաքն, այնուամենայնիվ, տեղի ունեցավ` համեստ մասշտաբով և այլ վայրում: Մի քանի տասնյակ մարդիկ ծիածանի դրոշներով հավաքվեցին Վրաստանի ՆԳՆ-ի շենքի մոտ` ծայրահեղական խմբերի հակաակցիաների ֆոնին:
