ՆԱՏՕ-ի գլխավոր քարտուղար Յենս Ստոլտենբերգը Վրաստան այցից առաջ Բրյուսելում հայտարարել է, որ դաշինքը շարունակում է աջակցել Վրաստանին՝ կառույցին ինտեգրվելու ճանապարհին։
Ստոլտենբերգի գլխավոր ուղերձը Վրաստանի քաղաքացիներին այն է, որ երկիրն ավելի է մոտենում ՆԱՏՕ-ին, Հյուսիսատլանտյան դաշինքն էլ ավելի կուժեղացնի ՆԱՏՕ-ի ներկայությունը Վրաստանում:
ՆԱՏՕ-ի գլխավոր քարտուղարը միևնույն ժամանակ ասել է, որ Վրաստանը կառույցի անդամագրվելու ճանապարհին դեռևս շատ անելիքներ ունի, որոնք վերաբերում են բարեփոխումներին, օրենքի գերակայությանը, պաշտպանական ինստիտուտի արդիականացմանը: Դաշինքի քարտուղարի գնահատմամբ, Վրաստանը ՆԱՏՕ-ի արժանի գործընկերն է:
«Մենք շարունակում ենք Վրաստանի եվրատլատյան ինտեգրացիայի ճանապարհին գործնական և քաղաքական աջակցություն ցուցաբերել»,- հայտարարել է Ստոլտենբերգը:
Հիշեցնենք՝ ՆԱՏՕ-ի գլխավոր քարտուղարը Վրաստան է ժամանելու մարտի վերջին:
