Վրաստանի ներքին գործերի նախարարությունը (ՆԳՆ) ևս մեկ վարչական գործ է հարուցել «Բաթումելեբի» և «Նեթգազեթի» անկախ լրատվամիջոցների հիմնադիր Մզիա Ամաղոբելիի դեմ, հաղորդել է «Բաթումելեբի»-ն։

Ըստ «Բաթումելեբի»-ի՝ այս վարչական գործի շրջանակներում դատավարությունը նշանակված է այսօր՝ մայիսի 7-ին, ժամը 12:00-ին Բաթումիի քաղաքային դատարանում։ Այս փուլում հայտնի չէ, թե արդյոք Մզիա Ամաղլոբելիին անձամբ տրամադրվել է դատավարության վերաբերյալ տեղեկատվություն։

Այն տեղեկությունը, որ ՆԳՆ-ն Մզիա Ամաղլոբելիին նոր վարչական իրավախախտման մեղադրանք է առաջադրել, և որ դատավարությունը նշանակված է այսօր, հայտնի է դարձել այսօրվա դատական ​​նիստի ժամանակացույցից։

Մայիսի 11-ին կլրանա Ամաղլոբելիի ձերբակալության չորս ամիսը։ Նա նախնական կալանքի տակ է Բաթումիի ոստիկանապետ Իրակլի Դգեբուաձեին ապտակելու համար. նրան մեղադրանք է առաջադրվել «ոստիկանի վրա հարձակում» հոդվածով և սպառնում է 4-ից 7 տարվա ազատազրկում։

Նոր վարչական գործի շրջանակներում, ըստ «Բաթումելեբի»-ի, ՆԳՆ-ն Ամաղլոբելիին մեղադրում է Բաթումիի ոստիկանության բաժանմունքի դիմաց գտնվող օժանդակ շենքի վրա 2025 թվականի հունվարի 11-ին՝ իր ձերբակալության օրվա երեկոյան, պաստառ փակցնելու և պատի արտաքին տեսքը փչացնելու համար:

Գործը դատարան է ներկայացվել Վարչական իրավախախտումների վերաբերյալ օրենսգրքի 150-րդ հոդվածի 1-ին մասի համաձայն։