Վրաստանի խորհրդարանի պատվիրակությունը Պրահայում է, մասնակցում է Ղրիմի միջազգային հարթակի երկրորդ խորհրդարանական գագաթնաժողովին, հայտնում է Վրաստանի խորհրդարանի մամուլի ծառայությունը։

Այս տարի գագաթնաժողովը կազմակերպել են Ուկրաինան և Չեխիան։ Դրա նպատակն է համակարգել Ուկրաինային համերաշխության և աջակցության միջոցները։ Հարթակի նպատակն է բարելավել Ղրիմի շարունակվող օկուպացմանը միջազգային արձագանքման արդյունավետությունը և արձագանքել անվտանգության մարտահրավերներին:

Գագաթնաժողովին մասնակցելու են Վրաստանի խորհրդարանի փոխնախագահ, Ուկրաինայի հետ բարեկամության խմբի ղեկավար Արչիլ Թալակվաձեն, Եվրոպական ինտեգրման հանձնաժողովի նախագահ Մակա Բոճորիշվիլին և արտաքին հարաբերությունների հանձնաժողովի նախագահի առաջին տեղակալ Մարիամ Լաշխին։

Բոճորիշվիլին ասել է, որ Վրաստանի մասնակցությունը Ուկրաինային աջակցելու համար ստեղծված ֆորումին «ևս մեկ անգամ հաստատում է Վրաստանի աջակցությունը ուկրաինացի ժողովրդին և Ուկրաինայի ինքնիշխանության, տարածքային ամբողջականության և անկախության համար պայքարին»։