Վրաստանի օրենսդիր մարմնի 2026 թվականի աշնանային նստաշրջանին ներկայացված Կառավարության օրենսդրական գործունեության կարճաժամկետ պլանում նախատեսված է Վարչական իրավախախտումների վերաբերյալ օրենսգրքում նոր հոդվածների ավելացում։

Փաստաթղթում մասնավորապես նշված է, որ արտահանման նպատակով եթե անձը պլաստմասե իրեր է պատրաստում, ապա մեկ ամիս առաջ դրա մասին գրավոր պետք է տեղեկացնի Բնապահպանական վերահսկողության դեպարտամենտին։

Նշված պարտավորությունը չկատարելու համար գործող օրենսդրությունում պատժամիջոց նախատեսված չէ, և Կառավարությունը անհրաժեշտ է համարում Վարչական իրավախախտումների վերաբերյալ օրենսգրքում ավելացնել համապատասխան հավելումներ։

Փաստաթղթում նշված է, որ պատժամիջոցներ կսահմանվեն պինդ օգտակար հանածոների վերամշակման (ջարդում և/կամ տեսակավորում) գործունեությունից օդի աղտոտման համար։

Նախատեսված փոփոխություններով պատժամիջոցներ կսահմանվեն նաև Վրաստանի տարածք այնպիսի ծովային վառելիքի, ծանր վառելիքի և գազոյլի ներմուծման, արտադրության և մատակարարման համար, որոնց մեջ ծծմբի պարունակությունը գերազանցում է սահմանված առավելագույն շեմը։

Տուգանքներ կսահմանվեն հողի բերրի շերտը հեռացնելու, պահպանման պարտադիր աշխատանքները չիրականացնելու և դրա տեղափոխման կանոնները խախտելու համար։

Հիշեցնենք, որ նույն պլանում ներառված է, որ Վրաստանի վարչական իրավախախտումների վերաբերյալ օրենսգրքում իրականացվելիք փոփոխություններով կխստացվեն պատժամիջոցները Վրաստանում տեսանելի արտանետումներ արձակող ավտոմեքենաների ստուգումից հրաժարվելու կամ խուսափելու համար։