Վրաստանի երրորդ նախագահ, այժմ անազատության մեջ գտնվող Միխեիլ Սաակաշվիլիի փաստաբան Շալվա Խաճապուրիձեն հայտնել է, որ բժշկական անկախ փորձաքննության բյուրոյի ներկայացուցիչ Ալեքսանդրե Գեջաձեն իրեն ասել է, որ 2021 թվականի հուլիսի 5-ի իրադարձությունների ժամանակ զոհված Լեքսո Լաշքարավայի մահվան վերաբերյալ ներկայացրել է Վրաստանի ներքին գործերի նախարարությանը (ՆԳՆ) ցանկալի եզրակացություն։

Խաճապուրիձեի հայտարարությանը նախորդել էր մեղադրող կողմի միջնորդությունը, ըստ որի` Սաակաշվիլիի գործով նոր հանգամանքներ են բացահայտվել, մասնավորապես՝ քրեակատարողական ծառայության հրապարակած տեսագրությունը, որն արվել է «Վիվամեդ» կլինիկայում։ Հենց այս կադրերի հիման վրա էլ մեղադրող կողմը պահանջել է բուժզննում անցկացնել՝ Սաակաշվիլիի առողջական վիճակը գնահատելու համար։ Նրանց կարծիքով, այս հետազոտությունը պետք է պատասխանի այն հարցին, թե արդյո՞ք երրորդ նախագահը տառապում է ծանր հիվանդությամբ։

Մեղադրող կողմը փորձաքննությունն անցկացնելու համար միջնորդել է երեք փորձագիտական ​​հիմնարկների՝ Սամխարաուլիի քննության ազգային բյուրոյին, «Վեկտոր» անկախ քննական կենտրոնին և «Իրական փորձագետ» ՍՊԸ-ին։

Հիշեցնենք, որ TV Pirveli-ի օպերատոր Լաշքարավան մահացել է 2021 թվականի հուլիսի 11-ին։ Մինչ այդ՝ հուլիսի 5-ին, Թբիլիսիում կատաղի ցույցի մասնակիցները նրան բռնության էին ենթարկել մասնագիտական ​​պարտականությունները կատարելիս։