Բելառուսի ավտորիտար առաջնորդ Ալեքսանդր Լուկաշենկոն շնորհավորել է օտարերկրյա առաջնորդներին նացիստական Գերմանիայի նկատմամբ տարած հաղթանակի 80-ամյակի կապակցությամբ։ Նա նաև իր շնորհավորանքներն է հղել «Վրացական երազանք»-ի ընտրած Վրաստանի 6-րդ նախագահ Միխեիլ Կղավելաշվիլիին, որի լեգիտիմությունը չեն ճանաչում վրացական ընդդիմությունն ու հասարակության մի մասը։
Լուկաշենկոյի խոսքով, մայիսի 9-ը «խորհրդանշում է բոլոր նրանց անզուգական քաջությունն ու ուժը, ովքեր ճակատում պայքարել են ֆաշիզմի դեմ և թիկունքում պայքարել են իրենց հայրենի հողի ազատությունն ու անկախությունը պաշտպանելու համար»։
«Բելառուսներն ու վրացիները նշանակալի ներդրում են ունեցել մեր ընդհանուր հայրենիքի շագանակագույն ժանտախտից ազատագրման գործում։ Մինսկը հարգանքի տուրք է մատուցում Սերգո Ճիղլաձեի և Միրզա Գելովանիի հիշատակին, որոնք անմահ հերոսություն ցուցաբերեցին Բելառուսի համար մարտերում և մեզ համար դարձան Վրաստանի քաջարի որդիների ռազմական քաջության մարմնացումը։ Վստահ եմ, որ հաղթանակած հերոսների նկատմամբ անսահման երախտագիտությունն ու հարգանքը կշարունակեն կարևոր գործոն լինել մեր երկրների և ժողովուրդների միջև բարեկամության ամրապնդման գործում», — նշել է Բելառուսի ավտորիտար առաջնորդը:
Լուկաշենկոն շնորհավորանքներ է հղել ԱՊՀ երկրների, Վրաստանի, Սլովակիայի ղեկավարներին, նաև Ուկրաինայի և Մոլդովայի ժողովուրդներին։
Ավելի վաղ Ռուսաստանի նախագահ Վլադիմիր Պուտինը շնորհավորել էր ԱՊՀ երկրների (Ադրբեջան, Հայաստան, Բելառուս, Ղազախստան, Ղրղզստան, Տաջիկստան, Թուրքմենստան, Ուզբեկստան) ղեկավարներին, Իսրայելին, ՌԴ-ի կողմից օկուպացված Աբխազիայի և Հարավային Օսիայի փաստացի ղեկավարներին, նաև վրաց և մոլդավացի ժողովուրդներին՝ նացիստական Գերմանիայի նկատմամբ տարած հաղթանակի 80-ամյակի կապակցությամբ։
Անցյալ տարվա վերջին Լուկաշենկոն Կղավելաշվիլիին շնորհավորել էր նախագահ ընտրվելու կապակցությամբ, այս տարվա փետրվարին էլ Բելառուսի նախագահական ընտրություններում 7-րդ անգամ անընդմեջ հաղթանակի կապակցությամբ Կղավելաշվիլին շնորհավորել էր Լուկաշենկոյին:
