Կոռուպցիոն հանցագործության մեջ մեղադրվող նախկին վարչապետ Իրակլի Ղարիբաշվիլիի գործով ըստ էության քննությունն այսօր սկսվում է․ նիստին ներկա է լինելու նաև Ղարիբաշվիլին։ Այս մասին «Ինտերպրեսնյուսին» հայտնել է նախկին վարչապետի փաստաբան Սոսո Բարաթաշվիլին։

Այսօրվա դատական նիստին, որը տեղի կունենա Թբիլիսիի քաղաքային դատարանում ժամը 16:00-ին, կողմերը հանդես կգան ներածական խոսքով։

Հիշեցնենք․ Դատախազությունը Իրակլի Ղարիբաշվիլիին մեղադրանք է առաջադրել Վրաստանի Քրեական օրենսգրքի 338-րդ հոդվածի 2-րդ մասի «ա», «գ» ենթակետերով և 3-րդ մասի «ե» ենթակետով, ինչը ենթադրում է պետական-քաղաքական պաշտոն զբաղեցնող անձի կողմից խմբակային եղանակով առանձնապես խոշոր չափերով կաշառք ստանալը և որպես պատիժ նախատեսում է 11-ից 15 տարի ժամկետով ազատազրկում։

Իրակլի Ղարիբաշվիլին դատապարտված է առանձնապես խոշոր չափերով ապօրինի եկամուտների օրինականացման (լվացման) համար։ Դատավարական համաձայնության (դատախազական համաձայնագրի) հիման վրա նրան դատապարտել են 5 տարվա ազատազրկման և նշանակել 1 միլիոն լարի տուգանք։