Արևմտյան քաղաքական գործիչները արձագանքել են ընդդիմության առաջնորդներից Նիկա Մելիայի ձերբակալությանը, որը տեղի է ունեցել երեկ երեկոյան։
ԱՄՆ ներկայացուցիչների պալատի անդամ, MEGOBARI Act-ի համահեղինակ Ջո Ուիլսոնը X-ում գրել է.
«Հակաամերիկյան «Վրացական երազանք»-ի ռեժիմը ձերբակալեց ընդդիմության գլխավոր առաջնորդներից Նիկա Մելիային նույն կեղծ պատրվակով, ինչպիսին տեսանք ընդդիմության դեմ նախորդ հարձակման ժամանակ։
Ակնհայտ է, որ ընդդիմության նկատմամբ լիակատար արգելք է կիրառվում։
Լուծումը պատժամիջոցներն են»։
Էստոնիայի խորհրդարանի արտաքին հարաբերությունների հանձնաժողովի նախագահ Մարկո Միհկելսոնը գրել է, որ «Վրացական երազանք»-ի նպատակը բոլոր քաղաքական ընդդիմադիր ուժերի վերացումն է.
«Եվրամիությունը պետք է անհապաղ արձագանքի և սկսի առանց վիզայի ճանապարհորդության վերացման գործընթացը»։
Եվրախորհրդարանի անդամ Ռասա Յուկնևիչենեն, որն այս շաբաթ Թբիլիսիում էր, գրել է.
«Քիչ առաջ ձերբակալվեց վրացական ընդդիմության մեկ այլ առաջնորդ՝ Նիկա Մելիան։ Մեկ շաբաթ առաջ՝ Զուրաբ Ջափարիձեն։ Վրաստանում իրավիճակը օրեցօր վատանում է։
Եվրոպական միությունը և դրա անդամ պետությունները պետք է գործեն»։
Ներքին գործերի նախարարության տվյալներով՝ Մելիան ձերբակալվել է «Վարչական իրավախախտումների վերաբերյալ օրենսգրքի 173-րդ հոդվածի հիման վրա»։ Նրա թիմակիցները կատարվածն անվանել են «առևանգում»։
