Վրաստանի արհմիությունների միավորման գլխավոր քարտուղարը կլինի Իրակլի Պետրիաշվիլին, իսկ նախագահը` Ռաիսա Լիպարտելիանին։

2025 թվականի հոկտեմբերի 24-ին արհմիությունների 120-ամյա պատմության մեջ առաջին անգամ տեղի է ունեցել ղեկավարների ընտրություն այլ կառուցվածքով։ Նոր կարգի համաձայն, միությունը տնօրենի փոխարեն կղեկավարեն գլխավոր քարտուղարը և նախագահը։ Գլխավոր քարտուղարի տեղակալների պաշտոնները զբաղեցրել են Թամար Սուրմավան և Լավրենտի Ալանիան։

Արհմիության հաղորդմամբ՝ հոկտեմբերի 24-ին կայացած 16-րդ համագումարին մասնակցել են 175 պատվիրակ և ավելի քան 50 հրավիրված տեղացի ու միջազգային հյուրեր, այդ թվում՝ տարբեր երկրների արհմիություններից։

Համագումարը լսել և հաստատել է 2021-2025 թվականների հաշվետվությունը, նաև հաստատել է 2026-2029 թվականների գործողությունների ծրագիրը։

«Հատուկ շեշտադրում է կատարվել երկրի եվրոպական ինտեգրման կարևորության վրա` աշխատողների համար արժանապատիվ աշխատանքային չափանիշներ ապահովելու գործում», — ասված է միության հայտարարության մեջ։