Այսօր՝ ապրիլի 28-ը աշխատավայրում մահացածների և վիրավորվածների միջազգային օրն է։
Վրաստանի աշխատանքի տեսչության հաղորդագրության համաձայն՝ աշխատավայրում դժբախտ պատահարների հետևանքով մահացածների թիվն ըստ տարիների հետևյալն է.
- 2021-ին մահացել է 37 քաղաքացի,
- 2020-ին մահացել է 39 քաղաքացի,
- 2019-ին մահացել է 45 քաղաքացի,
- 2018-ին մահացել է 59 քաղաքացի:
«Վերջին չորս տարիներին աշխատավայրում պատահարների վիճակագրության համաձայն՝ մահացության մակարդակի նվազում է նկատվում, սակայն իրավիճակը դեռ ծանր է»,- նշել են աշխատանքի տեսչությունից։
Նրանց խոսքով, աշխատանքի անվտանգության օրենսդրության մշակման և կատարելագործման առումով երկիրն առաջընթաց է գրանցում, սակայն նույնը չի կարելի ասել ենթաօրենսդրական ակտերի մասին։
«Վրաստանի ենթաօրենսդրական ակտերը, 2013 թվականից ուժի մեջ մտած, այսպես կոչված, «Տեխնիկական կանոնակարգը» վերաբերում է տնտեսական գործունեության միայն որոշակի հատվածին։ Համապատասխանաբար, այն ոլորտներում, որտեղ աշխատանքի անվտանգության խնդիրները չեն կարգավորվում վրացական օրենսդրությամբ, և՛ գործատուները, և՛ կարգավորողները պետք է առաջնորդվեն մինչև 1992 թվականը գործող խորհրդային կանոնակարգերով: Հետևաբար, գործունեության այս ոլորտներում վերահսկիչները չունեն գործատուների նկատմամբ վարչական տույժեր կիրառելու իրավական մեխանիզմ, նույնիսկ եթե աշխատավայրում խախտումներ հայտնաբերվեն»,- ասված է հաղորդագրության մեջ։
Ըստ հաղորդագրության՝ օրենսդրական դաշտի կատարելագործումը և օրենքի խստագույն կիրարկումն անհրաժեշտ են երկրում աշխատանքի անվտանգության վիճակը բարելավելու համար.
«Աշխատանքի անվտանգության վիճակի գնահատման հիմնական ցուցանիշները արդյունաբերական վթարների և մասնագիտական հիվանդությունների վիճակագրությունն է, որը պետությունը դեռևս չի արձանագրել»։
