Վրաստանի քաղաքային զարգացման հիմնադրամը հանրակրթական դպրոցների բարեկարգման և վերանորոգման համար շուրջ 49․25 միլիոն լարիի 3 տենդեր է հայտարարել։
Ծրագրով նախատեսվում է 56 դպրոցի բակերի և հարակից տարածքների բարեկարգում, իսկ մեկ տենդերը վերաբերում է բուն դպրոցի շենքի վերանորոգմանը։
Բոլոր երեք գնումներն էլ հայտարարվել են օգոստոսի 17-ին։ Երկու տենդեր նախատեսում է դպրոցների տարածքների բարեկարգում և ցանկապատում, իսկ երրորդը՝ Քարելիի մունիցիպալիտետի Մոխիսի գյուղի հանրային դպրոցի վերակառուցումն ու վերանորոգումը։
Ամենախոշոր՝ 25 միլիոն լարի արժողությամբ տենդերը վերաբերում է Արևելյան Վրաստանի հանրային դպրոցների տարածքների բարեկարգմանը։ Հայտերի ընդունումը կսկսվի սեպտեմբերի 13-ին և կավարտվի սեպտեմբերի 18-ին։ Այս տենդերում ընդգրկված է 35 դպրոց։
Տենդերի շրջանակում «Design-Build» (նախագծում և կառուցում) մեթոդով պետք է պատրաստվի համապատասխան նախագծանախահաշվային փաստաթղթավորումը, և իրականացվեն շինարարական աշխատանքները։ Պայմանագրի գործողության ժամկետը սահմանվում է դրա կնքման պահից մինչև 2028 թվականի դեկտեմբերի 31-ը ներառյալ։
