Կանանց իրավունքների պաշտպանությամբ զբաղվող «Սաֆարի» կազմակերպությունը արձագանքում է «Փանջարա» հարթակի և նրա բլոգերների ու ակտիվիստների վրա կազմակերպված հարձակմանը։
Կազմակերպությունը նշում է, որ «Սաֆարին» կանգնած է երիտասարդ ակտիվիստների կողքին, ովքեր պայքարում են իրենց իրավունքների, ադրբեջանական համայնքի և Վրաստանի ավելի լավ ապագայի համար։
«Վերջին մի քանի օրվա ընթացքում կազմակերպված հարձակում է տեղի ունեցել «Փանջարայի» վրա արմատական խմբերի կողմից, այդ թվում՝ պետական պաշտոնյաների և որոշակի կրոնական կազմակերպությունների պատկանող անձաց կողմից։ Ամենացավալին այն է, որ նրանք սոցիալական ցանցերում հարձակվում են երիտասարդ բլոգերների և ակտիվիստների վրա, հետապնդում են նրանց՝ լռեցնելու համար»,- նշված է կազմակերպության տարածած հայտարարության մեջ։
Նշենք, որ «Փանջարան» վրաց-ադրբեջանական հարթակ է, որն ուղղված է էթնիկ ադրբեջանցի քաղաքացիների ավելի լավ ինտեգրմանը հասարակության մեջ։
«Փանջարան» ֆեյսբուքյան հարթակ է, որը հիմնադրվել է «Սաֆարիի» կողմից, որտեղ էթնիկ ադրբեջանական համայնքի երիտասարդները խոսում և քննարկում են համայնքի այնպիսի հարցեր, ինչպիսիք են մարդու իրավունքները, կրթության հասանելիությունը, կանանց հզորացումը, ակտիվությունը և այլն:
Նշվում է, որ սա առաջին դեպքը չէ, երբ «Սաֆարին», նրա հարթակները, բլոգերներն ու աջակիցները ենթարկվում են նմանատիպ ճնշման:
«Սաֆարին» նշում է, որ «Փանջարան» շարունակում է աշխատել և աջակցել այն արժեքներին, որոնց համար ստեղծվել է հարթակը։
Հատկանշական է, որ վերջին օրերին «Փանջարայի» հրապարակած տեսանյութերը, որտեղ խոսվում է կանանց վերարտադրողական առողջության մասին, դժգոհություն են առաջացրել առանձին խմբերի մոտ։ Այս խմբերի ներկայացուցիչները պնդում են, որ կանանց վերարտադրողական առողջությանը վերաբերող նյութերը նպաստում են վաղ տարիքից սեռական կյանքի մեկնարկին։
