«Թրանսփարենսի Ինթերնեշնլ-Վրաստան» (TI) հասարակական կազմակերպությունը (ՀԿ) գնահատել է Վրաստանի խորհրդարանի 2022 թվականի գործունեությունը:

Ըստ TI-ի՝ 2022 թվականին խորհրդարանում ելույթի իրավունքից չի օգտվել 18 պատգամավոր, նրանց թվում՝ խորհրդարանի հայազգի պատգամավորներ Սամվել Մանուկյանը և Սումբատ Կյուրեղյանը:

ՀԿ-ի տվյալներով՝ նրանցից 10-ը խորհրդարանի իշխող «Վրացական երազանք» կուսակցության անդամներ են.

• Էլգուջա Գոցիրիձե,
• Իսկո Դասենի,
• Սումբատ Կյուրեղյան,
• Լևան Կոբիաշվիլի,
• Սամվել Մանուկյան,
• Գոգի Մեշվելիանի,
• Դիմիտրի Սամխարաձե,
• Գոդերձի Չանքսելիանի,
• Վասիլ Չիգոգիձե,
• Վիքտոր Ջափարիձե:

8-ն՝ ընդդիմության ներկայացուցիչներ են.

• Գրիգոլ Վաշաձե,
• Աբդուլլահ Իսմայիլով,
• Մանուչար Կվիրկվելիա,
• Կոբա Նակղոփիա,
• Ռամազ Նիկոլաիշվիլի,
• Բաչուկի Քարդավա,
• Ցեզար Չոչելի,
• Դիլար Խաբուլիանի:

Կազմակերպության տվյալներով, խորհրդարանի 84 պատգամավորի համար արտերկիր գործուղումների համար ծախսվել է 1 մլն 739 հազար 782 լարի 93 թեթրի։ Իսկ խորհրդարանի 25 անդամի` կարգապահական պատասխանատվության հիմքով, աշխատավարձից կրճատվել է, ընդհանուր առմամբ, 68 հազար 704 լարի 69 թեթրի։

TI-ն դրական է գնահատել հետևյալ օրենքների ընդունումը.

• գենդերային ազդեցության գնահատման ինստիտուցիոնալացում,
• ընտանեկան բռնության զոհերի համար ապաստանի նոր կանոնի ներդրում:

Դրական օրենսդրական փոփոխություններ, որոնք, ըստ ՀԿ-ի, բարելավման կարիք ունեն.

• հակակոռուպցիոն բյուրոյի ստեղծում,
• ընտրական օրենսգրքի փոփոխություններ,
• խորհրդարանական վերահսկողության բարելավում։

Բացասական են գնահատվել օրենսդրական հետևյալ փոփոխությունները.

• թաքնված քննչական գործողություններում մարդու իրավունքների մակարդակի վատթարացում,
• ատելության խոսքի իրավական կարգավորում։