«Դպրոցական սննդի հետ կապված մեր նպատակն է, որ փուլ առ փուլ բոլոր դպրոցներում լինի սնվելու հնարավորություն, և զուգահեռաբար աշակերտների շրջանում արմատավորվի առողջ սննդի մշակույթը»,- խորհրդարանում հայտարարել է կրթության նախարար Գիվի Միքանաձեն։
Ինտերպելյացիայի (պատգամավորական հարցապնդման) կարգով իր ելույթի ժամանակ նա խոսել է նաև դպրոցական սննդի մասին և նշել, որ այս ուղղությամբ մի քանի կարևոր աշխատանք արդեն իրականացվել է։
«Առաջին հերթին ուսումնասիրվել է դպրոցներում գործող բուֆետների և սննդի կետերի վիճակը, և դպրոցների վերականգնման գործընթացում հատուկ շեշտադրում է արվում սննդի կետերի կարգավորման վրա։
Միանգամայն ակնհայտ է, որ սննդի անվտանգության և սննդակարգի հետ կապված հարցերը միայն մեր նախարարության իրավասության ներքո չեն, ուստի այս ուղղությամբ մենք ինտենսիվորեն աշխատում ենք ինչպես Առողջապահության նախարարության, այնպես էլ Գյուղատնտեսության նախարարության Սննդի ազգային գործակալության հետ։ Արդյունքում մշակվել է համապատասխան փաստաթուղթ, որը հաստատվել է նախարարի հրամանով։
Փաստաթուղթը մանրամասնորեն կարգավորում է անձնակազմի հիգիենայի, մոնիտորինգի և վերահսկողության հարցերը, նաև սահմանում է թույլատրելի և արգելված մթերքների ցանկը։ Հատուկ ուշադրություն է դարձվում առողջ սննդի սկզբունքների պահպանմանը։ Դպրոցի սննդի բլոկում արգելվել է այնպիսի մթերքների օգտագործումը, ինչպիսիք են՝ մաստակը, կոնֆետը, շոկոլադը, բուրավետացված խորտիկները (օրինակ՝ չիպսերը, ժելեբոնները և այլն), աղի, շաքարով կամ ճարպով մշակված ընդեղենը, մրգերն ու բանջարեղենը, մայոնեզը և մայոնեզով պատրաստված արտադրանքը, պահածոյացված մթերքները, ջերմային մշակման ենթարկված ձուն, սունկը՝ ցանկացած տեսքով, կրեմային հրուշակեղենը, քաղցր գազավորված ըմպելիքները և սուրճը։
Նախարարության համար կարևոր է նաև մոնիտորինգի արդյունավետ մեխանիզմի առկայությունը, հենց այդ պատճառով դպրոցները պարտավոր են ստեղծել մոնիտորինգի խմբեր, որոնցում ներգրավված կլինեն աշակերտներ, ծնողներ, ուսուցիչներ (ցանկալի է նաև կենսաբանության մանկավարժներ), նաև դպրոցի բժիշկը կամ բուժքույրը և տնօրինության ներկայացուցիչները։ Անհամապատասխանություն հայտնաբերելու դեպքում խումբը պարտավոր է անհապաղ տեղեկացնել դպրոցի տնօրենին և Սննդի ազգային գործակալությանը։
Դպրոցական ենթակառուցվածքների զարգացմանը զուգահեռ, նախարարությունը, համագործակցելով համապատասխան գերատեսչությունների հետ, շարունակում է աշխատանքը սննդի համար պատշաճ միջավայր ապահովելու ուղղությամբ։ Դպրոցական սննդի ծրագրի զարգացման նպատակով իրականացվել է հանրային դպրոցների ենթակառուցվածքների մանրամասն հետազոտություն՝ կապված միջազգայնորեն փորձարկված դպրոցական սննդի չորս մոդելների համապատասխան կարիքների հետ։
Նշված չորս մոդելները ներառում են՝ «հաբ» (կենտրոնական) դպրոցների ստեղծումը, որոնք կմատակարարեն այլ դպրոցների, դպրոցներում խոհանոցների կահավորումն ու տեղում պատրաստումը, «հաբ» դպրոցներից սնունդ ստացող դպրոցներ տեղափոխումը և, այսպես կոչված, «լանչբոքսերով» (սննդի տուփերով) մատակարարումը։
Սակայն դպրոցական սննդի համակարգի ներդրումն ավելին է, քան պարզապես ենթակառուցվածքների կարգավորումը։ Անհրաժեշտ է կառուցել ամբողջական լոգիստիկ ցանց, կարգավորված պետք է լինի սննդի ենթակառուցվածքը, սննդի պահպանման համար անհրաժեշտ պայմանները, պատրաստվեն համապատասխան մարդկային ռեսուրսներ, որպեսզի լիովին ապահովվի հիգիենիկ-սանիտարական նորմերի պահպանումը։ Ըստ այդմ, դպրոցական ժամերին սննդի հարցի լուծմանը մենք մոտենում ենք համակարգված և կողմնորոշված ենք կայուն մեխանիզմի ստեղծմանը»,- ասել է նախարարը։
