Վրաստանի խորհրդարանը 85 կողմ, 16 դեմ ձայներով կենտրոնական ընտրական հանձնաժողովի (ԿԸՀ) նախագահ է ընտրել Գիորգի Կալանդարիշվիլիին։ «Ընտրական օրենսգրքում» կատարված փոփոխությունների համաձայն՝ նա կպաշտոնավարի հինգ տարի։ Խորհրդարանը ԿԸՀ անդամներ է ընտրել Մաիա Զարիձեին, Գիորգի Շարաբիձեին և Գիա Ցացաշվիլիին։
Խորհրդարանական մեծամասնությունից բացի, պայմանավորվածության համաձայն, Կալանդարիշվիլիի թեկնածությանը կողմ են քվեարկել «Գիրչի» քաղաքական խմբի անդամները։ «Գիրչի»-ի պատգամավոր Սանդրո Ռակվիաշվիլին ասել է, որ իրենց քաղաքական խմբի բոլոր չորս անդամները պաշտպանել են ԿԸՀ նախագահի թեկնածությունը։
Ապրիլի 1-ին հայտնի դարձավ «Գիրչի»-ի նախագահ Իագո Խվիչիայի և խորհրդարանական մեծամասնության առաջնորդ Մամուկա Մդինարաձեի շփման մասին։ Նրանք պայմանավորվել են, որ կուսակցական ցուցակներում կանանց քվոտան չեղարկելու դիմաց «Գիրչի»-ն ԿԸՀ նախագահի պաշտոնում կաջակցի «Վրացական երազանք»-ի համար ընդունելի թեկնածուին։ «Գիրչի»-ի խնդրանքով խորհրդարանը արագացված կարգով քննարկեց «Ընտրական օրենսգրքում» փոփոխությունները և վերջնական՝ երրորդ ընթերցմամբ, ապրիլի 4-ին ընդունեց դրանք։
Սակայն նախագահ Սալոմե Զուրաբիշվիլին դրա վրա վետո դրեց։ Ապրիլի 29-ին դատական հանձնաժողովը քվեարկեց նախագահի վետոն չեղարկելու օգտին: Հարցը լիագումար նիստում դեռ չի քննարկվել։
Օրենսդրության համաձայն՝ առաջին քվեարկության ժամանակ ԿԸՀ նախագահ ընտրելու համար անհրաժեշտ էր 90 ձայն, սակայն, ինչպես պարզաբանել է խորհրդարանի նախագահ Շալվա Պապուաշվիլին, պատգամավորների գործուղումների պատճառով բավարար թվով ձայներ չեն կարողացել հավաքել։ Կրկնակի քվեարկության ժամանակ բավարար էր 76 ձայնը։
Ինչ վերաբերում է ԿԸՀ նախագահի թեկնածուի ընտրության գործընթացին, ապա ընտրական մրցութային հանձնաժողովում նախագահի կողմից նշանակված անդամ Լևան Շենգելիան ապրիլի 11-ին դադարեցրել է իր անդամակցությունը, որին նախորդել էր ոչ կառավարական երկու ներկայացուցիչների նմանատիպ որոշումը: Գիորգի Կալանդարիշվիլին ԿԸՀ-ի նախագահի միակ թեկնածուն էր։
Փետրվարի 20-ին «Ընտրական օրենսգրքում» հաստատված փոփոխություններով 76 ձայնով պահպանվել է խորհրդարանական մեծամասնության լծակը՝ ԿԸՀ նախագահին և անդամներին ընտրելու ամբողջ հինգ տարի ժամկետով։
Ընտրական օրենսգրքում նախկինում հաստատված վիճահարույց փոփոխությունը մնաց ուժի մեջ, ըստ որի՝ Վրաստանի խորհրդարանի նախագահը կընտրի և խորհրդարանին կներկայացնի ԿԸՀ նախագահին/անդամության թեկնածուներին՝ Վրաստանի նախագահի փոխարեն։ Խորհրդարանը հաղթահարեց օրենսդրական փոփոխությունների վրա դրված նախագահի վետոն:
