Թբիլիսիի քաղաքապետարանը հինգերորդ անգամ տուգանել է Ռուսթավելիի պողոտայում վերականգնողական աշխատանքներ իրականացնող ընկերությանը․ այս տեղեկությունը տարածել է BPN-ը։ Խոսքը «Սմարթ Սոլուշնս» ընկերության մասին է, որին դրամական տուգանքը, նախորդ դեպքերի նման, դարձյալ նշանակվել է աշխատանքները 24-ժամյա ռեժիմով կատարելու պարտավորությունը խախտելու համար։ Ինչպես պարզվում է պետական գնումների վեբկայքում հրապարակված սեպտեմբերի 14-ով թվագրված տուգանքի հղումից, դրամական տուգանքի չափը դարձյալ 1583 լարի է։

Նշված գրառմամբ պարզաբանված է, որ 2026 թվականի սեպտեմբերի 13-ին (ժամը 19:51-ին) իրականացված տեսչական ստուգման ընթացքում Բեսիկի փողոցից մինչև Ազատության հրապարակ ընկած հատվածի վերականգնողական աշխատանքները 24-ժամյա ռեժիմով չեն ընթացել։

«Թբիլիսիի քաղաքապետարանի ենթակառուցվածքների զարգացման քաղաքային ծառայության 2026 թվականի սեպտեմբերի 14-ի նամակից պարզվում է, որ դուք խախտել եք Թբիլիսիի քաղաքապետարանի հետ 2026 թվականի հուլիսի 10-ին կնքված պետական գնման մասին պայմանագրի (Թբիլիսիի Մթածմինդայի շրջանի Շոթա Ռուսթավելիի պողոտայի` Բեսիկի փողոցից մինչև Ազատության հրապարակ հատվածի վերականգնողական աշխատանքներ) պայմանները։

Մասնավորապես, վերոնշյալ պայմանագրի շրջանակներում, Թբիլիսիի քաղաքապետարանի ենթակառուցվածքների զարգացման քաղաքային ծառայության 2026 թվականի հուլիսի 27-ի նամակով ձեզ հանձնարարվել էր Թբիլիսիում, Մթածմինդայի շրջանում, Ռուսթավելիի պողոտայի (Բեսիկի փողոցից մինչև Ազատության հրապարակ) վերականգնողական աշխատանքներն իրականացնել 2026 թվականի հուլիսի 28-ից՝ 24-ժամյա ռեժիմով (պայմանագրի 3-րդ հոդվածի 3.5 կետին համապատասխան), սակայն 2026 թվականի սեպտեմբերի 13-ի տեսչական ակտից (տեսչական ստուգման իրականացման ժամը՝ 19:51) պարզվում է, որ վերոնշյալ օբյեկտում աշխատանքները 24-ժամյա ռեժիմով չեն ընթացել։

Պետական գնման մասին պայմանագրի 9-րդ հոդվածի 9.8 կետին համապատասխան, քանի որ աշխատանքների վերահսկողության ընթացքում գնորդի իրականացրած տեսչական ստուգմամբ հաստատվել է, որ մատակարարը տվյալ պահին չէր իրականացնում պայմանագրով նախատեսված աշխատանքները, ձեր դեմ սահմանվել է տուգանք՝ պայմանագրի արժեքի 0.02%-ի չափով՝ 1583.34 լարի»,- նշված է նամակում։