Վրաստանի իշխող «Վրացական երազանք» կուսակցության նախագահ Իրակլի Կոբախիձեն, անդրադառնալով Ուկրաինայի Ռադայի «Ժողովրդի ծառա» խմբակցության ղեկավար Դավիթ Արախամիայի կոչին, ասել է, որ Ուկրաինայում պատերազմի ավարտից հետո հանրությունը «վատ բաներ» կիմանա Դավիթ Արախամիայի մասին։
Նշենք, որ Ուկրաինայի Ռադայի «Ժողովրդի ծառա» խմբակցության ղեկավար Դավիթ Արախամիան Եվրամիությանն ու ԱՄՆ-ին կոչ է արել պատժամիջոցներ կիրառել Վրաստանի իշխող «Վրացական երազանք» կուսակցության հիմնադիր, Վրաստանի նախկին վարչապետ, մեծահարուստ Բիձինա Իվանիշվիլիի նկատմամբ:
Ըստ Կոբախիձեի՝ Արախամիան Վրաստանում արմատական ընդդիմության կազմում է, իսկ Ուկրաինայում՝ իշխանության։
«Վրացական երազանքի» անդամ, պատգամավոր Բեքա Դավիթուլիանին Արախամիային անվանել է «ուտոպիստ ու լկտի»։
«Մի բան հաստատ է, չգիտես ինչու, պատահում է, որ ընդդիմության արմատական թևը քարոզարշավ է սկսում, իսկ հետո այս քարոզարշավի շրջանակներում նրանց համակիրները հիասթափվում են, որ չեն կարողանում հասնել որևէ նպատակի։ Հետո, օ՜, զարմանալիորեն, հանկարծ պարզվում է, որ Ուկրաինայից մեկը, նրանց ուտոպիստ ընկերը, Արախամիայի պես լկտի մարդ, կսկսի խոսել ինչ-որ պատժամիջոցների մասին»,- ասել է Դավիթուլիանին։
Ըստ Դավիթուլիանիի՝ այն խոսակցությունները, թե «Վրացական երազանքի» հիմնադիր Բիձինա Իվանիշվիլին և ռուս միլիարդատեր Վլադիմիր Եվտուշենկովը խոսել են, «հիմարություն» են.
«Արախամիայի լկտի հայտարարությունն այնտեղից, այստեղից մոնտաժված տեսանյութը և ենթադրյալ սկանդալը ստեղծվել են երկրում իրավիճակը սրելու համար»:
Կարդացեք նաև՝
Իվանիշվիլիի և Եվտուշենկովի զրույցի ձայնագրությունը՝ նոր քաղաքական քննարկման առիթ
