«Ալիք Մեդիան»  «Վրաստան» թերթի հետ համագործակցության շրջանակներում շաբաթական կտրվածքով ներկայացնում է թերթում տեղ գտած գլխավոր նորություններից հատվածներ:

Հունիսի 26-ի համարում՝

Իրակլի Ղարիբաշվիլի. Մենք ունենք հզոր Վրաստան ստեղծելու տաղանդ և ներուժ

Հունիսի 25-ին Վրաստանի վարչապետ Իրակլի Ղարիբաշվիլին խորհրդարանում հանդես եկավ կառավարության գործունեության մեկամյա ծրագրի հաշվետվությամբ։ Նշենք, որ դեռեւս հունիսի 1-ին վարչապետի 151 էջանոց հաշվետվությունը ներկայացվել էր խորհրդարանին։

2030 ԹՎԱԿԱՆԻՆ ԱԶԳԱՅԻՆ ՓՈՔՐԱՄԱՍՆՈՒԹՅՈՒՆՆԵՐԻ 95 ՏՈԿՈՍԸ ԿՏԻՐԱՊԵՏԻ ՎՐԱՑԵՐԵՆԻՆ

Վարչապետի հայտարարությամբ, առանձնակի ուշադրություն կհատկացվի պետական լեզվի ծրագրին, այն հաշվով, որ արդեն 2030 թվականին ազգային փոքրամասնությունների 95 տոկոսը կտիրապետի վրացերենին: Ներկայացնելով կառավարության գործունեության 10-ամյա ծրագիրը՝ վարչապետ Իրակլի Ղարիբաշվիլին խորհրդարանում հայտարարեց, որ երկրի զարգացման ու առաջընթացի այդ ծրագրի գլխավոր նպատակը հզոր Վրաստանի ստեղծումն է, այն հզոր Վրաստանի, որը պետք է դառնա վրացիների, աբխազների, օսերի, հայերի, ադրբեջանցիների, այս երկրում ապրող բոլոր մարդկանց, բոլոր հյուրերի ընդհանուր տունը: Այն պետք է կառուցվի բոլորիս համատեղ ջանքերով, եւ մենք կհասնենք այդ արդյունքին։ — Մենք դրա տաղանդն ու ներուժն ունենք: Մենք պետք է Վրաստանը վերածենք մի երկրի, որին դարեր շարունակ ձգտել են մեր նախնիները: Մեզ պետք է քաղաքական խաղաղություն, կայունություն եւ երկարաժամկետ զարգացում: Մեր երկիրն իր արժանի տեղը պետք է գրավի՝ որպես ամենահին ու եզակի մշակույթ ունեցող ազգ եւ որպես ուժեղ պետություն,- հայտարարեց Իրակլի Ղարիբաշվիլին:

Ժողովրդավարության հարթակի ընտրություններ. Վրացական ԶԼՄ-ների արձագանքը

Հունիսի 20-ին Հայաստանում կայացած խորհրդարանական արտահերթ ընտրությունները եւ Նիկոլ Փաշինյանի գլխավորած «Քաղաքացիական պայմանագրի» համոզիչ հաթանակը լայն արձագանք է ստացել ինչպես Հայաստանում, այնպես էլ՝ նրա սահմաններից դուրս: Ստորեւ ձեր ուշադրությանն ենք ներկայացնում այս թեմայով վրացական մամուլում հրապարակված առանձին քաղաքագետների մեկնաբանությունները:

Թբիլիսյան «Ինտերպրեսնյուսին» տված հարցազրույցում Գլոբալիզացիայի եւ տարածաշրջանային հետազոտությունների կենտրոնի ղեկավար Ստեփան Գրիգորյանը նշել է, որ Հայաստանում արտահերթ ընտրությունները պայմանավորված էին Ղարաբաղյան պատերազմում պարտության ու համավարակի արդյունքում ստեղծված տնտեսական ծանր իրավիճակի հետեւանքով քաղաքական ճգնաժամի կարգավորման անհրաժեշտությամբ: Արտահերթ ընտրությունները գործնականում պայքար էր ներկայիս իշխանության եւ նախկին Քոչարյան-Սարգսյան իշխանության միջեւ: Իշխանության ընդդիմախոսները Փաշինյանին եւ նրա իշխանությանը մեղադրում էին դավաճանության մեջ: Ընտրություններում Փաշինյանի հաղթանակը հստակ ցույց տվեց, որ հայ ժողովուրդը Ղարաբաղյան պատերազմում պարտությունը չի առնչում նրա անվան հետ:

Երկրների ցանկը, որտեղից կարելի է Վրաստան գալ առանց պատվաստման 

Վրաստանի կառավարությունն ընդլայնել է այն երկրների ցանկը, որոնց քաղաքացիները կարող են Վրաստան գալ` առանց պատվաստման` միայն բացասական «PCR» թեստի պատասխանով:

Նոր ցանկում են Սան Մարինոն, Մոնակոն, Սերբիան, Իսլանդիան, Լիխտենշտայնը, Չեռնոգորիան, Անդորրան, Հյուսիսային Մակեդոնիան եւ Բոսնիա ու Հերցեգովինան: Այս երկրների քաղաքացիները, ինչպես նաեւ կացության թույլտվություն ունեցողները կարող են մուտք գործել Վրաստան ոչ շուտ, քան մուտքից 72 ժամ առաջ արված «PCR» թեստի բացասական պատասխանով: Այս դեպքում պարտադիր կլինի երկրորդ «PCR» թեստը` ժամանելուց հետո երրորդ օրը (իրենց հաշվին): Ավելի վաղ նույն կարգն էր հաստատվել հետեւյալ երկրների նկատմամբ. ԵՄ երկրներ, Իսրայել, Թուրքիա, Շվեյցարիա, Նորվեգիա, ԱՄՆ, Մեծ Բրիտա- նիա եւ Հյուսիսային Իռլանդիա, Միացյալ Թագավորություն, Սաուդյան Արաբիա, Քաթար, ՄԱԷ, Բահրեյն, Հայաստան, Ադրբեջան, Ուկրաինա, Ղազախստան, Ռուսաստան, Բելառուս, Ուզբեկստան, Տաջիկստան, Ղրղզստան, Թուրքմենստան, Կանադա, Ճապոնիա, Քուվեյթ, Չինաստան, Հարավային Կորեա, Օման եւ Մոլդովա: COVID-19-ի դեմ պատվաստված բոլոր օտարերկրացիները կարող են գալ Վրաստան` բացառությամբ նրանց, որոնք վերջին երկու շաբաթվա ընթացքում այցելել են Հնդկաստան: Բոլոր օտարերկրյա այցելուները Վրաստան մուտք գործելիս պետք է իրենց մոտ ունենան բժշկական ապահովագրություն, որը, անհրաժեշտության դեպքում, կծածկի կորոնավիրուսային վարակի բուժման ծախսերը:

Ամրագոտին պարտադիր է դառնում նաև հետևի նստատեղիի ուղևորների համար

Հնարավոր է, որ մոտ ժամանակներում Վրաստանում պարտադիր դառնա ավտոմեքենայի հետևի նստատեղիի ուղեւորի ամրագոտի կապելը:

«Վրաստան» թերթը 100 տարեկան է