Վրաստանի ֆինանսների նախարարության տվյալներով՝ 2022-ի առաջին 6 ամսում Վրաստանի տարածքով անցել է 209 հազար բեռնատար, ինչը 51 հազարով ավելի է նախորդ տարվա նույն ժամանակահատվածի համեմատ։ Սա նշանակում է, որ ամեն օր ավելի քան 1 150 բեռնատար անցել է երկրի տարածքով:

Վրաստանի տարածքով անցնող յուրաքանչյուր բեռնատար մինչև 2022 թվականի հունիսի 20-ը վճարել է 200 լարի (մոտ 64 դոլար): Նշենք, որ հունիսի 20-ից Վրաստանի տարանցիկ ճանապարհի վճարը դարձել է 350 լարի (մոտ 114 դոլար)։

Ընդհանուր առմամբ հունվար-հունիս ամիսներին տարանցիկ բեռներից բյուջե է փոխանցվել 41,9 մլն լարի եկամուտ։ 2021 թվականի ընթացքում Վրաստանի միջանցքով ընդհանուր առմամբ օգտվել է 332 հազար բեռնատար, որից բյուջե է փոխանցվել 66,4 միլիոն լարի ճանապարհօգտագործման հարկ։

Նշենք, որ վճարի բարձրացման արդյունքում 2022 թվականին միջազգային տարանցման եկամուտը պետք է հասնի 90 մլն լարիի, իսկ մինչև 2023 թվականը հավանաբար կհասնի 150 մլն լարիի։

Ըստ ֆինանսների նախարարության՝ բարձրացնելով տարանցիկ ճանապարհների օգտագործման վճարը, պետությունը կկարողանա մոբիլիզացնել լրացուցիչ եկամուտներ։

Վրաստանի տարածքով այլ երկրներ բեռ փոխադրող բեռնատարների համար վճարը բարձրանում է