Ձերբակալվել է Բրյուսելի օդանավակայանում նախօրեին կատարված ահաբեկչության կասկածյալներից մեկը` Նաջիմ Լաշրաուին: Այս մասին հայտնում է «Ֆրանս պրեսը»` հղում անելով բելգիական լրատվամիջոցներին:
Ձերբակալվածը կասկածվում է նաև Փարիզում ահաբեկչություն կատարելու նպատակով պայթուցիկ նյութերի պատրաստման մեջ: 
Բելգիական ոստիկանությունն ավելի վաղ տարածել է ահաբեկչության կասկածյալների անունները: Բացի Լաշրաուիից, տրվում են Խալիդ և Բրահիմ էլ-Բակրաուի եղբայրների անունները: Հրապարակվել է նաև երեք կասկածյալների մասնակցությամբ տեսանյութ, կադրերը ֆիքսել է բրյուսելյան օդանավակայանի անվտանգության տեսախցիկը` պայթյունից առաջ:
«Իսլամական պետություն» ահաբեկչական խմբավորումը, որն իր վրա է վերցրել Բրյուսելի ահաբեկչության պատասխանատվությունը, հրապարակել է հարձակման մանրամասները: Խմբավորմանը պատկանող լրատվամիջոցներից մեկի` «Ալմակ» գործակալության հայտարարության մեջ ասվում է, որ «Իսլամական պետության» զինյալները հարձակումն իրականացրել են մահապարտների գոտիներով և պայթուցիկ նյութերով:
«Նրանք հարձակվել են օդանավակայանի և կենտրոնական մետրոյի վրա, Բելգիայի մայրաքաղաքի կենտրոնում, երկիր, որը «Իսլամական պետության» դեմ համաշխարհային միավորման անդամ է»,- ասված է հայտարարության մեջ:
Ահաբեկիչների խոսքերով` զինյալները օդանավակայանում կրակ են բացել, որից հետո պայթեցրել են իրենց, իսկ մետրոյում` ըստ նրանց իսկ տարածած տեղեկության`Մալբեկ կայարանում իրեն պայթեցրել է մահապարտը: Հայտարության մեջ նշվում է, որ ջիհադիստները Բելգիայի մայրաքաղաքի թիրախները ընտրած են եղել նախապես:
Միաժամանակ «Իսլամական պետությունը» սպառնում է նոր հարձակումներով: Ինչպես հաղորդում է «BBC»-ն` Ահաբեկիչները սպառնացել են, որ «Իսլամական պետության» դեմ պայքարող` իրենց խոսքերով` «խաչակիր» երկրների համար վատ ժամանակներ են գալու:
Բելգիայում եռօրյա սուգ է հայտարարված. Նախօրեին կատարված ահաբեկչությունը ավելի քան երեք տասնյակ մարդու կյանք է խլել, վնասվածքներ է ստացել 200-ից ավելի մարդ:
Հիշեցնենք`մարտի 22-ին Բրյուսելի միջազգային օդանավակայանում երկու պայթյուն է որոտացել, մեկ ժամ չանցած երրորդ պայթյունն է տեղի ունեցել մետրոյի Մալբեկ կայարանում:
