Թբիլիսիի պետական համալսարանում հայ և վրացի մի խումբ ուսանողներ ու պրոֆեսորներ փորձում էին հասկանալ, թե որն է հայ-վրացական համագործակցության հաջողակ մարտավարությունը:
Միջոցառումը հանդիսանում է Հարավային Կովկասում Հայնրիխ Բյոլ հիմնադրամի ֆինանսական աջակցությամբ իրականացվող «Հայ-վրացական ակադեմիական համագործակցություն 2» նախագծի մի մասը:
Այն նպատակ ունի համատեղ հետազոտությունների միջոցով հասարակագիտության ոլորտում աջակցել հայ-վրացական համագործակցությանը: Գիտաժողովին ուսանողները ներկայացնում էին իրենց հետազոտության արդյունքները և հանդես գալիս համագործակցության ռազմավարության առաջարկություններով:
Նախագծի համակարգող, Թբիլիսիի պետական համալսարանի պրոֆեսոր Քեթևան Խուցիշվիլին «Ալիք մեդիայի» հետ զրույցում նշեց, որ առաջին ծրագրի հաջողությունը ներշնչեց շարունակել այն:
«Բացի այն, որ ուսանողները նախագծի 
ընթացքում սովորում և խորացնում են իրենց գիտելիքները, ծրագիրը բարձր արժեք է ներկայացնում նաև գիտական տեսանկյունից: Ուսանողների կատարած հետազոտությունները շատ հետաքրքիր են»,-վստահեցրեց Խուցիշվիլին՝ հավելելով, որ ծրագրում մասնակցել կարող են Վրաստանի և Հայաստանի ցանկացած քաղաքացի առանց որևէ խտրականության:
Նրա խոսքով՝ ցանկացողների պակաս երբեք չի եղել. «Ստիպված ենք լինում ընտրել լավագույններից լավագույններին»:
Երևանի պետական համալսարանի Քաղաքակրթական եւ մշակութային հետազոտությունների կենտրոնի տնօրեն Դավիթ Հովհաննիսյանը ծրագիրը հաջողված է համարում երկու պատճառով. «Առաջինը՝ մեր մասնակիցների գիտական հետազոտության 
մակարդակը անհամեմատելիորեն բարելավվել է: Բացի այդ, մասնակիցները ծանոթանում են իրենց հարևան երկրի նիստ ու կացին, առօրյային»,- «Ալիք մեդիայի» հետ զրույցում Հովհաննիսյանը նշեց, որ երկու հարևան երկրների մասնակիցները մտերիմ ընկերներ են դարձել,-«Նրանք արդեն ջերմ են ու ակեղծ»: Հովհաննիսյանը ընդգծեց նաև, որ շատ կարևոր է երիտասարդներին միմյանց ճանաչելու հնարավորություն ընձեռել:
Ծրագրի մասնակիցներից Մարիամ Հովհաննիսյանի հետազոտությունը վերաբերվում է հայաստանյան դպրոցականների շրջանում Վրաստանի մասին առկա կարծրատիպերին: Ուսանողուհու խոսքերով՝ պարբերաբար հանդիպելով վրաստանցի ուսանողների հետ, հնարավոր է դարձել 
աշխատությունը տանել առավել ճշգրիտ ճանապարհով. «Հետազոտության արդյունքում հասակացա, որ մենք շատ թյուր կարծիք ունենք Վրաստանի մասին և Վրաստանի մասին մեր գիտելիքների մեծ մասը գալիս է սեփական փորձից, դասագրքերում այդ մասին շատ քիչ է խոսվում: Գուցե հետագայում կարողանանք ձեռնարկել քայլեր՝ այդ թյուր ըմբռնումներն ու կարծիքները կանխելու համար»:
«Իմ համար նման միջազգային ծրագրի առկայությունը շատ հաճելի անակնկալ էր: 
Հետազոտությունս մշակութային ինքնության թեմայով էր, որի իրականացման ընթացքում ձեռք եմ բերել բազում ընկերներ Հայաստանից: Տպավորություններս այնքան ոգևորող էին, որ որոշել եմ դիպլոմայինս գրել հենց այս թեմայով»,- ասում է ծրագրի մասնակից Մարիամ Մժավիան։
Նախագիծն իրականացվում է «Հազարաշեն» ազգաբանական հետազոտությունների կենտրոնի նախաձեռնությամբ, Վրաստանի մարդաբանների ասոցացիայի, Թբիլիսիի Իվանե Ջավախիշվիլիի և Երևանի պետական համալսարանի աջակցությամբ:
