«Վրացական երազանք»-ի խորհրդարանն այսօր` չորեքշաբթի օրը, հաստատել է ժամանակավոր քննչական հանձնաժողովի զեկույցը, որը ստեղծվել է Միխեիլ Սաակաշվիլիի և «Միացյալ ազգային շարժման» գործողությունները նրա իշխանության օրոք հետաքննելու և բացահայտելու նպատակով։
Հանձնաժողովի զեկույցի հիման վրա «Վրացական երազանք»-ի կառավարությունը նախատեսում է օգտագործել Սահմանադրական դատարանը՝ «Միացյալ ազգային շարժման» և այլ ընդդիմադիր կուսակցությունների գործունեությունն արգելելու համար։
Հանձնաժողովի ստեղծումից հետո դրա գործառույթներն ընդլայնվել են. 2003-2012 թվականների ժամանակահատվածից բացի, դրա իրավասությունը ընդլայնվել է ընդդիմադիր քաղաքական գործիչների մինչ օրս գործողությունները ուսումնասիրելու առումով։
Հանձնաժողովի զեկույցի վերաբերյալ լսումները տեղի են ունեցել Ռուսթավելիի պողոտայում ընթացող բողոքի ակցիայի պայմաններում։ Օրվա ընթացքում ոստիկանությունը ձերբակալել է ավելի քան 23 ցուցարարի, որոնք բողոքում էին հանձնաժողովի 2008 թվականի օգոստոսյան պատերազմի վերաբերյալ եզրակացությունների դեմ։
Հանձնաժողովի ղեկավար Թեա Ծուլուկիանին խորհրդարանում հայտարարել է, որ մի շարք վրացական ՀԿ-ներ, նաև «Ազգային շարժում», «Փոփոխության համար», «Հզոր Վրաստան» և «Գախարիա Վրաստանի համար» կուսակցություններն ու կոալիցիաները «խոչընդոտում են առողջ քաղաքական համակարգի ձևավորմանը»։ Նրա խոսքով՝ «2012-2025 թվականներին Վրաստանն անընդհատ ստիպված էր բախվել այնպիսի մարտահրավերների, ինչպիսիք են սահմանադրական կարգը բռնության միջոցով փոխելու բազմաթիվ փորձերը, որոնց հիմնական մեղավորներն են ապակառուցողական ընդդիմությունը և արտասահմանից ֆինանսավորվող ոչ կառավարական կազմակերպությունները»։
Ծուլուկիանիի գլխավորած հանձնաժողովի զեկույցը բաղկացած է 473 էջից։
Հանձնաժողովի հիմնական եզրակացություններից են.
- «Վարդերի հեղափոխությունը» համարվում է պետական հեղաշրջում և, վերջին հաշվով, Միխեիլ Սաակաշվիլիի կողմից իշխանության զավթում։
- Սաակաշվիլիի կառավարման տարիներին կալանավորների և բանտարկյալների նկատմամբ կիրառվել է «խոշտանգումների և անմարդկային վերաբերմունքի համակարգված պրակտիկա»։ Դաժան վերաբերմունքը լայն տարածում է գտել, բարձրացվել է պետական քաղաքականության մակարդակի և ուղեկցվել է «բարձրաստիճան պաշտոնյաների մասնակցությամբ ահաբեկչությամբ»։
- «Սաակաշվիլիի ռեժիմը» զանգվածաբար խախտել է անձնական կյանքի իրավունքը՝ անօրինական հեռախոսազրույցների գաղտնալսման, հսկողության և կոմպրոմատային նյութերի տարածման միջոցով։ Զեկույցում խոսվում է «սև արխիվի» գոյության մասին՝ գաղտնի ձայնագրություններով, որոնք դեռևս կարող են օգտագործվել քաղաքական նպատակներով։
- Զեկույցի մի մասը նվիրված է կոռուպցիային և «բիզնեսի շորթմանը». հանձնաժողովը պնդում է, որ առևտրային TBC բանկը, դրա տնօրեններ Մամուկա Խազարաձեն և Բադրի Ջափարիձեն, նաև մի շարք աշխատակիցներ մասնակցել են բիզնես շորթման սխեմաներից մեկին, որին նպաստել է «Ազգային շարժում»-ը։
- Հանձնաժողովը մեղադրում է Միխեիլ Սաակաշվիլիին և «Ազգային շարժմանը» 2004 թվականից ի վեր Վրաստանի տարածքային ամբողջականությանը և Ցխինվալիի տարածաշրջանի ու Կոդորի կիրճի վերաբերյալ խաղաղության գործընթացին վնաս հասցնող քայլեր ձեռնարկելու համար։ Զեկույցում ասվում է, որ 2008 թվականի օգոստոսին վրացական բանակը հայտնվել է ռազմական հարցերից հեռու «քաղաքական գործիչների ձեռքում», որոնք, հույսը դնելով արտաքին ուժերի օգնության վրա և անտեսելով վրաց զինվորականների կարծիքը, հարձակում են սկսել Ցխինվալիի վրա։ Հանձնաժողովը պնդել է, որ Սաակաշվիլիի և նրա թիմի գործողությունները ստեղծել են Ռուսաստանի 2008 թվականի գործողությունների հիմնական նախադրյալները։
