2024-2025 թվականներին բարձրաստիճան պաշտոնյաները հայտարարագրել են 34 միլիոն լարի ընդհանուր արժեքով նվերներ, հաղորդել է Transparency International Georgia-ն:

«Անհիմն եկամուտների քողարկումը նվերների միջոցով» ուսումնասիրության մեջ նշված է, որ այդ ժամանակահատվածում ընտանիքների անդամները պաշտոնյաներին տվել են 23 միլիոն լարի կանխիկ և 123 թանկարժեք անշարժ գույք:

«Իրակլի Ղարիբաշվիլիի օրինակով դատախազությունը հաստատեց, որ այսկերպ որոշ պաշտոնյաներ փորձում են քողարկել անօրինական եկամուտները…

Քննչական մարմինները, դատախազները, դատավորները, ՀՔԾ-ի և կոռուպցիայի դեմ պայքարի բյուրոյի աշխատակիցները տարիներ շարունակ զբաղվել են կոռուպցիան թաքցնելով։ Այժմ «Վրացական երազանք»-ի թիմի ներսում քաղաքական մրցակցին հեռացնելու գործընթացը դիտվում է որպես կոռուպցիայի դեմ պայքար։

Իրականում էլիտար կոռուպցիան եղել և մնում է շատ ավելի տարածված։

Միայն վերջին 5 տարվա ընթացքում Transparency International Georgia-ն գրանցել է էլիտար կոռուպցիայի 250 դեպք, որոնց մեջ ներգրավված է 221 բարձրաստիճան պաշտոնյա, նրանց թվում՝ 38 նախարար կամ փոխնախարար, 40 պատգամավոր, 17 դատավոր և 67 մունիցիպալ պաշտոնյա։

Այս կոռուպցիոն դեպքերը ներառում են այնպիսի սխեմաներ, ինչպիսիք են՝ բյուջետային միջոցների յուրացում պետական ​​գնումների միջոցով և այլն»,- նշված է TI-ի հայտարարության մեջ։

TI-ն հայտնել է, որ վերջին մի քանի ամսվա ընթացքում կազմակերպությունը կոռուպցիայի դեմ պայքարի բյուրոյին է ուղարկել TI-ի բացահայտած 65 կոռուպցիոն դեպքերի վերաբերյալ նյութեր, բայց ոչ մի արձագանք չի եղել։