Եկամուտների օրինականացում, պետական գույքի խարդախությամբ տիրացում, կեղծված խմիչքների արտադրություն, ծխախոտային արտադրանքի կոնտրաֆակտ արտադրություն. քննչական ծառայությունը 2025 թվականին հայտնաբերել է ձեռնարկատիրական կամ այլ տնտեսական գործունեության դեմ ուղղված հանցագործության 359 փաստ և քրեական հետապնդում է սկսել 432 անձի նկատմամբ։
Քննչական ծառայությունն առգրավել է աննախադեպ քանակությամբ՝ 75 հազար 203 շիշ ալկոհոլային խմիչք։
Քննչական ծառայության աշխատակիցները Գորի քաղաքում հայտնաբերել են ալկոհոլային խմիչքների արտադրության տնայնագործական գործարան, որտեղ կազմակերպված խմբի անդամներն իրականացրել են այլոց ապրանքանշաններով ապօրինի մակնշված, առանց ակցիզային դրոշմանիշների արտադրանքի թողարկում։
Առգրավվել է 10 մլն 863 հազար 120 լարի արժողությամբ 75 հազար 203 շիշ առանց ակցիզի ալկոհոլային խմիչք, ինչի կապակցությամբ քրեական հետապնդում է սկսվել կազմակերպված խմբի ութ անդամի նկատմամբ։
Քննչական ծառայության աշխատակիցները, օպերատիվ տեղեկատվության հիման վրա սկսված քրեական գործի շրջանակներում, քրեական հետապնդում են սկսել կազմակերպված խմբի 4 անդամի նկատմամբ։
Քննչական գործողությունների արդյունքում Գորի քաղաքում հայտնաբերվել է առանց ակցիզի ծխախոտների արտադրության տնայնագործական գործարան, որտեղից առգրավվել է 2 մլն 129 հազար 290 լարի արժողությամբ 313 հազար 131 տուփ առանց ակցիզի և այլոց ապրանքանշանով ապօրինի մակնշված ֆիլտրով ծխախոտ։
Քննչական ծառայության աշխատակիցները, առանձնապես խոշոր չափերով պետական գույքի խարդախությամբ տիրանալու և ապօրինի եկամուտների օրինականացման փաստերով, ձերբակալել են ընկերություններից մեկի երկու ղեկավարի, իսկ հանրային ծառայողին հավասարեցված անձի կատարած ծառայողական լիազորությունների չարաշահման փաստով՝ Վրաստանի մունիցիպալ զարգացման հիմնադրամի երեք աշխատակցի։
Քննությամբ պարզվել է, որ պաշտոնյաները և ընկերության ղեկավար անձինք, չարաշահելով լիազորությունները, մունիցիպալ զարգացման հիմնադրամի հայտարարած 30 մանկապարտեզների վերակառուցման-վերականգնման համար 11 տենդերների ընթացքում խարդախությամբ տիրացել են որպես կանխավճար փոխանցված 11 մլն 218 հազար 380 լարիից 9 մլն 365 հազար 801 լարիին և իրականացրել 1 մլն 211 հազար լարիի ապօրինի եկամտի օրինականացում։
Քրեական պատասխանատվության է ենթարկվել 7 անձ, որոնցից 2-ը կալանավորված են։
