Ռուսաստանի Անվտանգության խորհրդի փոխնախագահ Դմիտրի Մեդվեդևի խոսքով՝ որոշ պետություններ փորձում են «խանգարել» Հարավային Կովկասի երկրներին, որոնց Ռուսաստանը «զգուշությամբ է հետևում»։
Մեդվեդևն այս մասին ասել է Իրանի Իսլամական Հանրապետության պետական հեռուստառադիոհաղորդավար IRIB-ին տված հարցազրույցում։
«Ինչ վերաբերում է Կովկասին, այո, որոշ պետություններ այժմ փորձում են այնտեղ խառնաշփոթ ստեղծել։ Նրանք փորձում են մասնատել Հարավային Կովկասի երկրները։ Սա ճիշտ է։ Մենք զգուշությամբ ենք հետևում դրան», — ասել է Մեդվեդևը։
Նրա խոսքով՝ սկզբում «արևմտյան աշխարհը» Վրաստանին առաջարկել է անդամակցել ՆԱՏՕ-ին, բայց, նրա կարծիքով, «դրանից ոչ մի լավ բան չի ստացվել»։
«Վրաստանը դեռևս ՆԱՏՕ-ի անդամ չէ։ Ներկայիս ղեկավարությունը գիտակցում է, որ սա, ակնհայտորեն, սխալ մոտեցում էր։ Այս ամենը մեզ հասցրել է հակամարտության», — ասել է Մեդվեդևը։
Մեդվեդևը նաև խոսել է Հայաստանի մասին՝ ասելով, որ այնտեղ իրավիճակը փոխվում է, քանի որ երկրի իշխանությունները հանրապետության զարգացման վեկտորի փոփոխությունը համարել են ճիշտ որոշում։
Նրա խոսքով՝ Ռուսաստանը ինքնուրույն է լուծում իր տարածաշրջանային խնդիրները, այդ թվում՝ Կովկասում։
