Այսօր Վրաստանի նախագահ Սալոմե Զուրաբիշվիլին պաշտոնական այցով կմեկնի Հյուսիսային Մակեդոնիա, որտեղ նախատեսվում են հանդիպումներ Հյուսիսային Մակեդոնիայի Հանրապետության բարձրաստիճան պաշտոնյաների՝ Նախագահ Ստևո Պենդարովսկու, Ազգային ժողովի նախագահ Թալաթ Ջֆերիի և առաջին փոխվարչապետ՝ Արտան Գրուբիսի հետ:
Վրաստանի նախագահի մամուլի ծառայության փոխանցմամբ՝ Հյուսիսային Մակեդոնիայի Հանրապետության Նախագահի հետ առերես և ընդլայնված հանդիպումներից հետո կստորագրվի երկու փաստաթուղթ՝ «Վրաստանի և Հյուսիսային Մակեդոնիայի հանրապետության կառավարությունների միջև վիզա ստանալու պարտավորությունից ազատելու մասին» և «Հյուսիսային Մակեդոնիայի Հանրապետության հետ մշակույթի ոլորտում համագործակցության մասին» հուշագրերը:
Այցի շրջանակներում նախատեսված են Վրաստանի նախագահի հանդիպումները հյուսիսային Մակեդոնիայում աշխատող վրացի մարզիկների, մշակութային ոլորտի ներկայացուցիչների հետ:
Նախագահի պաշտոնական այցը Հյուսիսային Մակեդոնիա կավարտվի մայիսի 11-ին:
