Վրաստանի վարչապետ Իրակլի Ղարիբաշվիլին «Ուկրաինայի համար» բարձր մակարդակի դոնորների միջազգային համաժողովի բարեգործական նիստում իր ելույթի ժամանակ ասել է, որ «Վրաստանը մոբիլիզացրել է իր բոլոր ռեսուրսները՝ մեղմելու Ուկրաինայում ընթացող ավերիչ պատերազմի հետևանքները»:
«Մենք կանգնած ենք միջազգային հանրության կողքին և մեր լիակատար քաղաքական համերաշխությունն ենք հայտնում Ուկրաինային՝ ինչպես երկկողմ, այնպես էլ բազմակողմ ձևաչափերով»,- ասել է Ղարիբաշվիլին:
Ըստ վարչապետի՝ ուկրաինական պատերազմը հանգեցրել է տարածաշրջանում ծանր հումանիտար ճգնաժամի, և միջազգային հանրությունից ակնկալում է անհապաղ միջոցներ ձեռնարկել.
«Մենք դատապարտում ենք Ուկրաինայի դեմ Ռուսաստանի ռազմական ագրեսիան, որը կոպտորեն խախտում է միջազգային իրավունքի հիմնարար սկզբունքներն ու նորմերը, ՄԱԿ-ի կանոնադրությունը և աննախադեպ մարտահրավեր է ներկայացնում եվրոպական անվտանգությանը»:
Ղարիբաշվիլիի խոսքով՝ Վրաստանն արդեն 7 միլիոն դոլար է հատկացրել, և կառավարությունը շարունակում է օգնել ներկայումս Վրաստանում գտնվող 28 հազար ուկրաինացիներին, որոնք տուժել են Ռուսաստանի շարունակվող ռազմական հարձակումից։
«Ավելի քան 500 տոննա մարդասիրական օգնություն է ուղարկվել Ուկրաինա օդային և ցամաքային ճանապարհով: Մենք կշարունակենք օգնել մեր եղբայրական ժողովրդին, ինչի համար մինչև 2022 թվականի վերջը լրացուցիչ 7 միլիոն դոլար կհատկացնենք»,- իր ելույթում ասել է Ղարիբաշվիլին:
Ինչպես նշել է կառավարության ղեկավարը, Վրաստանն առաջինն է Ուկրաինային մարդասիրական օգնություն տրամադրող 191 երկրների շարքում.
«Մեր կառավարությունն օգնություն է տրամադրում Ուկրաինայից տեղահանվածներին՝ Ուկրաինայի քաղաքացիներին կացարան, առաջին անհրաժեշտության ապրանքներ, հագուստ, սնունդ, բժշկական օգնություն, ինչպես նաև դպրոցներ և մանկապարտեզներ մուտք գործելու համար»,- ասել է վարչապետը։
Նա նաև ընդգծել է, որ բացի այդ՝ ուկրաինացիների կողքին են նաև մասնավոր հատվածը, հասարակական կազմակերպությունները և քաղաքացիները:
«Ուկրաինացի ժողովրդին մաղթում եմ խաղաղություն և բարգավաճում»,- ասել է կառավարության ղեկավարը:
Կարդացեք նաև՝
Վրաստանն առաջինն է Ուկրաինային օգնություն ցուցաբերելու հարցով
