«Հավանայի համախտանիշ» (Հավանայի սինդրոմ) անունով անբացատրելի անոմալ առողջական խնդիրները կարող են պայմանավորված լինել Ռուսաստանի Գլխավոր հետախուզական ստորաբաժանման (GRU) 29155 ստորաբաժանման անդամների կողմից էներգետիկ զենքի կիրառմամբ: Այս մասին նշվում է աշխարհի երեք ազդեցիկ պարբերականների՝ The Insider-ի, 60 minutes-ի և Der Spiegel-ի հրապարակած լրագրողական հետաքննության արդյունքների մեջ:

Հենվելով Պենտագոնի բարձրաստիճան պաշտոնյայի վրա՝ լրագրողական հետաքննությունը գրում է, որ Ռուսաստանը ակուստիկ զենք է կիրառել ամերիկացի դիվանագետների դեմ աշխարհի մի շարք երկրներում, այդ թվում՝ Վրաստանում։ Վրաստանում տեղի ունեցած դեպքը թվագրվում է 2021 թվականի հոկտեմբերին։ Ըստ պարբերականների՝ թիրախը եղել է Վրաստանում ամերիկյան դեսպանատան աշխատակցի կինը։

Հոդվածում նշվում է, որ զոհված կինը 2020 թվականի փետրվարին համաճարակի ժամանակ ամուսնու հետ եկել է Վրաստան և բնակվել Թբիլիսիում՝ Դիղոմի մասիվում։ Նրա ամուսինը եղել է ԱՄՆ դեսպանատան արդարադատության դեպարտամենտի կցորդ։ Ջոյը (անունը փոխված է) հիշում է, որ մի օր նա հանկարծ լսել է մի բարձր, ծակող ձայն: Նա ասում է, որ դա ուղեկցվել է տարբեր ախտանիշներով, այդ թվում՝ ուժեղ ականջի և գլխի ցավերով, սրտխառնոցով:

Այդ դեպքից հետո նա ստուգել է տեսախցիկը, տեսել է, որ դրսում սև «Մերսեդես» մակնիշի մեքենա է կանգնած. դուրս է եկել փողոց, որտեղ տեսել է բարձրահասակ, նիհար տղամարդու և փորձել լուսանկարել նրան, սակայն շուտով վերջինս նստել է մեքենա և հեռացել: Ջոյը կարողացել է լուսանկարել միայն մեքենայի համարանիշը։ Նա հիշում է, որ նույն անձին տեսել է 3 տարի անց, երբ իրեն ցույց են տվել GRU-ի «29155-րդ ստորաբաժանման» անդամի լուսանկարը։

Խոսքը «29155-րդ ստորաբաժանման» հիմնադիր Անդրեյ Ավերիանովի որդու՝ Ալբերտ Ավերիանովի մասին է։ Ավերիանովը, ըստ հետաքննության՝ աշխատում է GRU-ի էլիտար ստորաբաժանումում, որը կոչվում է «29155-րդ ստորաբաժին»։ Նա պատասխանատու է մի շարք գործողությունների համար ամբողջ աշխարհում, այդ թվում՝ Սկրիպալների թունավորումը Մեծ Բրիտանիայում և 2014 թվականին Չեխիայի Վրցե քաղաքում զինամթերքի պահեստում տեղի ունեցած պայթյունը:

Հետաքննող լրագրողները գրում են, որ ձեռք են բերել մի փաստաթուղթ, որն ապացուցում է, որ «29155 ստորաբաժանման» մեկ սպա աշխատավարձի հավելավճար է ստացել «ոչ մահաբեր ակուստիկ զենքի» վրա աշխատելու համար։ Նրանց բացատրության համաձայն, ռուսական ռազմագիտական ​​գրականության մեջ այս տերմինը բնութագրվում է «էներգետիկ սարքեր՝ հիմնված ուլտրաձայնային և ռադիոալիքների վրա»։

Հետաքննությունը նկարագրում է նաև մի քանի դեպքեր, երբ GRU-ի գործակալները գտնվել են նույն քաղաքներում, որտեղ ամերիկացի դիվանագետներն այն ժամանակ հայտնել են «Հավանայի համախտանիշի» մասին։

Ի դեպ, «Հավանայի համախտանիշը» անվանում են չախտորոշված ​​հիվանդություն, քանի որ այն առաջին անգամ նկատվել է Կուբայի մայրաքաղաքում ԱՄՆ դեսպանատանը. 2016-2017 թվականներին դիվանագետներն ու անվտանգության ծառայությունների աշխատակիցները անհայտ պատճառներով հիվանդացել են: Քննության մեջ գրված է նաև, որ նմանատիպ դեպքեր գրանցվել են շատ ավելի վաղ՝ 2014 թվականին:

Վրաստանի Պետական ​​անվտանգության ծառայությունից այս պահին նշվածի վերաբերյալ մեկնաբանություն չեն տարածել: