ԱՄՆ պետդեպարտամենտի խորհրդական Դերեկ Սքոլը Վրաստան կատարած պաշտոնական այցի շրջանակներում հանդիպել է ընդդիմադիր կուսակցությունների առաջնորդների հետ։
Վրաստանի ընդդիմադիր «Գիրչի-ավելի շատ ազատություն» կուսակցության առաջնորդ Զուրաբ Ջափարիձեի խոսքով, հանդիպմանը Սքոլը լսել է բոլոր ընդդիմադիր ուժերի ներկայացուցիչներին։
Ջափարիձեն նշել է, որ ԱՄՆ իշխանություններն անհանգստացած են «Մթավարի արխիի» գլխավոր տնօրեն Նիկա Գվարամիայի ձերբակալությամբ, ընտրական և ընդհանրապես արդարադատության համակարգի հետ կապված հարցերով։
«Իմ դիրքորոշումն այն է, որ մենք առաջին անգամ ունենք կառավարություն, որի վերաբերմունքն Արևմուտքի նկատմամբ տարբերվում է մյուս բոլոր կառավարություններից։
Այժմ մենք ունենք կառավարություն, որը կրկնում է Պուտինի հռետորաբանությունը», — ասել է Ջափարիձեն:
«Դրոա» կուսակցության նախագահ Էլենե Խոշտարիան հայտնել է, որ հանդիպմանը քննարկվել է Նիկա Գվարամիայի ձերբակալության հարցը, ինչպես նաև անվտանգության խնդիրներն ու պատժամիջոցները։
«Ռազմավարությունն Աղմաշենեբելի» կուսակցության առաջնորդ Գիորգի Վաշաձեն ասել է, որ նման բարձր մակարդակի այց ԱՄՆ-ից Վրաստան չի եղել 2020 թվականից ի վեր։
