2026 թվականի առաջին կիսամյակում Վրաստանում տուրիզմից ստացված եկամուտը նվազել է 2%-ով և կազմել 1,93 միլիարդ դոլար։ Ազգային բանկի տվյալներով՝ անկումը հիմնականում կապված է այցելուների թվի նվազման հետ. հունվար-հունիս ամիսներին Վրաստան է այցելել 2,73 միլիոն միջազգային այցելու, ինչը նախորդ տարվա նույն ժամանակահատվածի համեմատ 76 հազարով կամ 3%-ով պակաս է։
Չնայած եկամուտների նվազմանը՝ մեկ այցելուի հաշվով միջին ծախսն ավելացել է։ Ազգային բանկի հրապարակած տուրիզմի եկամուտների վիճակագրությունն այցելուների վիճակագրության հետ համադրելիս պարզ է դառնում, որ 2026 թվականի առաջին կիսամյակում օտարերկրացի այցելուն Վրաստանում ծախսել է միջինում 706 դոլար, այնինչ 2025 թվականի նույն ժամանակահատվածում այդ ցուցանիշը 701 դոլար էր։
Ըստ երկրների՝ այցելուների ծախսերի ծավալը նշանակալիորեն տարբերվում է։ Օրինակ՝ Եվրամիության երկրներից ժամանած մեկ այցելուի միջին ծախսը կազմել է 1347 դոլար, ինչը էապես գերազանցում է Ռուսաստանի քաղաքացիների միջին ծախսը՝ 503 դոլար մեկ այցելության համար։
Արդյունքում, չնայած Ռուսաստանից Վրաստան այցելուների թիվը 2,5 անգամ գերազանցում էր Եվրամիությունից ժամանածների թվին, տուրիզմից ստացված եկամուտը երկու շուկայից էլ գրեթե հավասար է ստացվել։
2026 թվականի առաջին կիսամյակում Եվրամիության երկրներից Վրաստան է ժամանել 249 հազար 201 այցելու, որոնք ընդհանուր առմամբ ծախսել են մոտ 335,6 միլիոն դոլար։ Նույն ժամանակահատվածում Ռուսաստանի Դաշնությունից մուտք է գործել 610 հազար 825 այցելու, որոնց ծախսած գումարը կազմել է մոտ 307 միլիոն դոլար։
Ազգային բանկի վիճակագրության համաձայն՝ մեծ ծախսերով աչքի են ընկնում նաև Իսրայելից և Սաուդյան Արաբիայից ժամանած այցելուները։ Իսրայելի քաղաքացիների միջին ծախսը մեկ այցելության համար կազմել է 1519 դոլար, իսկ Սաուդյան Արաբիայի քաղաքացիներինը՝ 1469 դոլար։
Եվրամիության շուկան նույնպես աչքի է ընկնում մեկ այցելուի հաշվով մեծ ծախսով։ ԵՄ-ից ժամանած զբոսաշրջիկների Վրաստանում ծախսած գումարը գերազանցում է այնպիսի խոշոր զբոսաշրջային շուկաների ցուցանիշները, ինչպիսիք են Ռուսաստանն ու Թուրքիան։ Թուրքիայից ժամանած մեկ այցելուի միջին ծախսը կազմել է 485 դոլար։
Ամենաքիչ միջին ծախսը Հայաստանի քաղաքացիներինն է՝ 191 դոլար մեկ այցելության համար։ Ընդ որում, Հայաստանից ժամանած այցելուների թիվն ամենաշատերից է եղել և կազմել է 360 հազար 50 այցելու։
